Read Kahua KI 21 Bible Online

KI 21 - Kahua bible

KI 21

¹[១៨] Na maneraha ki vagevagesia na raramohamu, Araha. Ngaia ki koro teha na obana, suria go katoa, ki teharira na merongana.

²Igo ko vatea na marâ, i barigigi, ma ko aganaria na nunginungi iana.

³Igo ko hagakoro obana ngavê tanga, ma ko hagamahea renia na tarepuri na golo.

⁴Ngaia ki nungia na mauriha tenigo, ma igo ko votoa tanga na mauriha arihu ma tarema.

⁵Na bâbâhana ki raha, suria go tamania. Igo ko vatea, ki tonga na raramohana, ma ki rongo raha na atana.

⁶Igo ko korokoro tanga, ki bê ki arâ, ma na hetamaniha iamu ki hagakoro obana.

⁷Na maneraha ki hagêguri togo renia na Araha, i raramohaga hunia. Ngaia ki apeape tatara, ki bê ki arâ, suria na Araha ki takuia tare.

⁸Na maneraha ki page henahuraura na merongana hato, ma ki page rakura na ani hato, ga ruhia.

⁹Matena i arâ me, ngaia ki page hagaerasira ngavê, manga na ario igê na bagagi raha. Na Araha ki page hagamagahurura, suria i mangariaga tangara ma na gi ki page ngaura.

¹⁰I asa ta na hitangita na raraha iata, vige tahitahi i maveta, suria na maneraha ki page nahuira hato ngavê. Ma ki asa ta na hitangita na kareta, vige tahitahi i berarogata na enoni, suria ngaia ki page hagamagahurura ngavê.

¹¹Manga ga harikato renia, viga rêrapusia, ngaira ka page votavota.

¹²Ngaia ki page hanasira, ma ngaira ka page gavagava tenia.

¹³Igami kami kirigo, Araha, suria go hagabângenia na raramohamu raha. Igami kami page hagarahasigo, ma kami page visigo raha renia na raramohamu.