Read Kahua KI 22 Bible Online

KI 22 - Kahua bible

KI 22

¹[១៩] God iaku, God iaku, renia ta ko paniê? Inê kê gegege ma kê avarasigo, ma kê arisigo bâraha.

²Na tangiani ma na bungiani inê kê avarasigo, God iaku. Igo ko pe aganaria na nunginungi iaku, ma ki asa, be mauru, God iaku.

³Igo ko Araha raramohaga hunigo, ma na kare ni Isiraele ka visigo raha.

⁴Na uvarimami ka hagêguri togo renigo. Ngaira ka tako togo renigo, ma igo ko hagatahira.

⁵Ngaira ka avarasigo ma ka tahitahi. Ngaira ka hagêguri togo renigo, ma ka pe raruni era renigo.

⁶Ngaira ka pe katoê manga vi na enoni, ma ka puriê hete manga na sure. Na enoni ka meêmarabe, ma ka kikiteniê.

⁷Na ara ni enoni, ga bâsiê, ka tamasi erasiê. Ngaira ka hagakokohara tangê, ma ka karikaringe bê reniê.

⁸Ngaira ka vi tangê, ka vivi: “Igo ko hagêguri togo renia na Araha! Tanu hega ki pe hagatahigo? Manga vi na Araha, ma ki takuigo, tanu hega ki pe tamanigo?”

⁹Igo ko vateê na mauriha, matena gê vora me. Igo ko anumasiê, matena gê susu mênga.

¹⁰Inê kê bani hagêguri togo renigo, haganega tenia gê vora me. Igo na bani God iaku, tenia na matena na kenaku ki aparê me.

¹¹Siana ko hagarisiê, suria gê mamasiaga. Ma ki asa ta na enoni, vige tamaniê, nga noga ma igo.

¹²Na merongaku ka rihiê mangara na puruka mane. Na puruka mane ramo ni Basani ka rihiê.

¹³Ngaira ka manganga mangara na o vasiga, ga ngurunguru ma ka ngasiê.

¹⁴Na raramohaku ki anu, manga na ve i mamata i ano. Na apeku hagenani ki mangusi. Na bunaniaku ki mameaga.

¹⁵Ki mamata rârâ vê na rioku. Na meaku ki puru i bêparegoku. Igo ko paniê, matena gê tâ tanga na kiru.

¹⁶Rako na merongaku ka rihiê, manga ga rihiê na totoha ni o vasiga. Ngaira ka ahuragi na rimaku ma na êgaku.

¹⁷Inê kê rataga rârâ, ma ka oga so ma na suriku. Na merongaku ka boreteniê, ma ka makimaki teniê.

¹⁸Ngaira ka pile taisi renigi na gahu iaku, hanana viga tongani.

¹⁹Araha, siana ko hagarisiê! Rêrê me ku hagatahiê!

²⁰Gu anumasiê tenia na tatapa borahu. Gu hagatahiê tenira na o ngegana.

²¹Gu hagatahiê tenigi na harata na o ngegana ma tenigi na hota na puruka mane vasiga. Igo ko tamaniê, matena gê avarasigo.

²²Inê be hagarongora na goaku, na kariamu, renia na hetamaniha iamu tangê. Inê be visigo raha, matena ga hakuhaku me tanga na hagarahenga.

²³“Igamu na kariana na Araha, mu visia raha. Igamu na raraha iana o Jakobo, mu kasia akê na Araha. Igamu na kare ni Isiraele, mu bêtuhia na Araha.

²⁴Suria ngaia ki botage renira na enoni matareha, ma ki takusigi na mamasiaganiha iata. Ngaia ki pe murisigera, ma ki tamanira hete, matena ga avarasia.”

²⁵Matena ga hakuhaku me na kariamu tanga na hagarahenga, inê be visigo raha, Araha, renia na hetamaniha iamu tangê. I maata na enoni, ga rahesigo, inê be tagarenigi na vogasiha iaku, gê bani surugi.

²⁶Na enoni, ga matareha, ka page ngê masu. Na enoni, ga arâ ka rotu, ka page visigo raha. Inê kê nungigo, Araha, hanana ga mauri koro tare.

²⁷Na enoni hato i maveta ka page takusia aporo na Araha. Tenigi na ara ni agua i maveta hagenani ngaira ka page aporo, ka bêtu ka rahesia na Araha.

²⁸Na marungaha ki na anina na Araha. Ngaia ki marungira na enoni hato i maveta.

²⁹Na enoni, ga paroparo, ka page bêrusu i maana. Na enoni, ga tahitahi mêngara, ma na ani ga bani me nikâ ka page bêrusu i maana.

³⁰Na enoni i hemuri me ka page tê viteana na Araha. Na enoni ka page tarohenia na Araha tangara na kareta.

³¹Ka page hagarongora na enoni, ga page vora me, vi na Araha ki hagatahira na kariana.