Read Kahua KI 25 Bible Online

KI 25 - Kahua bible

KI 25

¹[២២] Inê kê avarasigo, Araha God iaku,

²suria gê raruni togo renigo. Siana kê raruni baguru. Siana na merongaku ka vagevage, renia ga tehariê.

³Suria i asa na enoni, i raruni togo renigo, vige raruni baguru. Ma ka raruni baguru hete na enoni era, ga urapusigo.

⁴Araha, gu hagesuriê renigi na obaniha iamu, ma ku hagagirarê renigi na tara iamu.

⁵Gu bêngeniê igê na monariha iamu, ma ku hagesuriê renia. Suria igo ki na God iaku, go hagatahiê, ma inê kê raruni togo renigo tare.

⁶Gu takusigi aporo, Araha, na korohamu ma na takuiha iamu, ga goga tare ma tarema. Igo ko bani hagabângenigi me tenia i nago kere vê noga.

⁷Gu bonotenigi na tasi iaku ma na parongaku era, matena gê karekare mênga. Gu takusiê aporo, Araha, suria na korohamu ma na takuiha iamu, ka goga tare ma tarema.

⁸Suria na Araha ki koro ma oto, ngaia ki hagaotora na enoni, ga tasi.

⁹Ngaia ki bêngenira igê na otoha na enoni, ga haritagi, ma ki hagesurira renigi na obaniha iana.

¹⁰Na tauhana na Araha ka hagabângenia, vi ngaia ki takuira tare ma ki toto surira na enoni, ga marupegi na suruheri ma na ramata iana.

¹¹Araha, gu hagamonaria na suruha iamu ma ku bonotenigi na tasi rako iaku.

¹²Na Araha ki hagesurira na enoni, ga tê viteana, renia na tarana, i tuguhira.

¹³Ngaira ka page mauri koro tare, ma na kareta ka page nahunia na agua na suruha.

¹⁴Na Araha ki mamahata tangara na enoni, ga tê viteana. Ngaia ki hagagirarara renia na suruheri iana.

¹⁵Inê kê raruni togo tare renia na Araha, vi ruhasiê tenia na tu, ma ki tamaniê.

¹⁶Gu ahariê, Araha, ma ku takuiê, suria i marehasiê na tamaku koro, ma kê anumanuma.

¹⁷Gu toregi vê teniê na takoha raha iaku, ma ku hagatahiê tenigi na anumanumaha iaku.

¹⁸Gu bâsigi na anumanumaha ma na mamasiaganiha iaku, ma ku bonotenigi na tasi hato iaku.

¹⁹Gu bâ! Ga rako na merongaku! Bâ! Ngaira ka kiteniê bâraha!

²⁰Gu anumasiê ma ku hagatahiê. Siana kê raruni baguru, suria gê gavagava vê i pasimu.

²¹Gu vateê, be matarotaro ma be oto tare, hanana siana gê tasitasi, suria gê raruni togo renigo.

²²God, gu hagatahira na kariamu, na Isiraelita, tenigi na ara ni bagabevoani hato.