Read Kahua KI 27 Bible Online

KI 27 - Kahua bible

KI 27

¹[២៤] Na Araha ki mavesiê ma ki hagatahiê. Ti kê page magutenia? Na Araha ki anumasia na mêrihaku. Ti ki page hagamagusiê?

²Na manero ma na merongaku, ga tahariê, ka page arâ ahehu, ma ka page votavota i ano.

³Naka ma na rehagaro na mane ni me ka rihiê, i asa hagetage be magu. Naka ma na rehagaro na merongaku ka tahariê, inê kê ama ni raruni togo nga renia God na Araha.

⁴Inê kê nungia na Araha renia na ani gi tage ma na marâ. Na marâ gi tage togo ma kê obania: be oga i ruma iana na Araha suria na mauriku hagenani. Hanana ve takotako renia na korohana, ma be nungia, ke bêngeniê.

⁵Igê na mateni na bagabevoani ngaia ki page hagatahiê i ruma iana. Ngaia ki page pinihiê i Ruma ni Rotu, ma kê page apeape tatara igê na hungana apuna iana.

⁶Vikê inê kê page teharira na merongaku, ga oga rihiê. Inê kê page vagevagesia na Araha ma kê page ngerengere, matena gê vogasi i Ruma ni Rotu. Inê kê page kiria na Araha, ma kê page visia raha.

⁷Gu karingê, Araha, matena gê avarasigo. Gu takuiê ma ku aganariê.

⁸Igo ko bani vi: “Gu rahesiê.” Inê kê arami, kê vi: “Be rahesigo, Araha.”

⁹Siana ko murisigeê! Siana ko mangariaga tangê. Siana ko paiê, inê na kariamu. Igo ko bani tamaniê tare. Siana ko kasiê i ngekê! God, hagamauri iaku, siana ko paniê i ngekê!

¹⁰Naka ma na enaku karu kasiê, igo, Araha, ko marupeê nga.

¹¹Araha, go hagesuriê renigi na obaniha iamu tangê. Gu bêngeniê igê na tara i tatara, suria na merongaku ka rako.

¹²Siana ko mahatangeniê tangara na merongaku. Ngaira ka tahariê renigi na hagaparunga iata ma ka hagamakukiê.

¹³Inê kê girara, gê page hatamia na korohana na Araha i maveta ikê.

¹⁴Mu hagêguri togo renia na Araha. Mu raruni togo renia. Siana kamu raroni era. Mu raroni koro renia na Araha.