Read Kahua KI 31 Bible Online

KI 31 - Kahua bible

KI 31

¹[២៨] Inê kê gavagava vê i pasimu, Araha, hanana go anumasiê. Gu hagatahiê igê na otohamu. I era ma kê hagêguri baranga renigo, ma kê maki renia.

²Gu karingê ma ku hagatahiê nga! Gu hagaramoniê ma ku marungiê. Gu manga na ruma nganganihaga tangê, gê tahitahi igê.

³I monari, igo ki na ruma nganganihaga iaku. Inê kê gava vê i pasimu, ma ko anumasiê. U hagaotoê ma ku bêngeniê, manga go bani surua tangê.

⁴Gu anumasiê tenia na tu pinihi tangê, suria igo ki na marungaku.

⁵Inê kê hagêgurigo, ko marupeê. Igo ko page hagatahiê, Araha God, suria igo ki na monariha.

⁶Igo ko kitenira na enoni, ga hagarapera na ataro, ma inê nga kê raruni togo renigo.

⁷Inê be vagevage ma be obakoro, suria igo ko takuiê tare. Igo ko bani hagamahê igê na mamasiaganiha iaku, ma na matena ga tarahuê na bagabevoani, igo ko bani tamaniê.

⁸Igo ko bani urapusira na merongaku hanana siana ka hagatotongoê. Renia na takuiha iamu tangê inê kê asitatara.

⁹Gu takuiê, Araha, suria inê kê anumanuma. Ka mamanu na maaku, suria gê angi bâraha, ma ki meme ngavê na apeku.

¹⁰Na mamasiaganiha ki nahuiê, ma na angiha ki hagabubua na mêrihaku. Inê kê peramo, ma ka mangusi ngavê na suriku, suria ga tarahuê na eraha.

¹¹Na merongaku hato ka hagakokohara tangê, ma na enoni i pasiku ka sikasika teniê. Na enoni, ga girarê, ka maguteniê, ma na matena ga tarahuê i tara, ngaira ka gavagava teniê.

¹²Na enoni ka tako hagamarehasiê, manga vi inê kê bani me noga. Inê kê manga na apira, i abota, ga kasia i bê ni roro.

¹³Inê kê rongora na merongaku rako ga hahanata. Ma na maguha ki nahuiê. Ngaira ka harikato reniê viga nahuiê kê meme.

¹⁴Ma inê kê raruni togo renigo, Araha. Igo ki na God iaku.

¹⁵Igo ko marupeê tare. Gu hagatahiê tenira na merongaku, tenira na ani ga merongasiê.

¹⁶Gu korokoro tangê, na kariamu, ma ku hagatahiê, suria go takuiê tare.

¹⁷Inê kê avarasigo, Araha. I era ma, kê avaravara baranga, ma kê maki renia. Gu hagamakira na enoni, ga era. Gu hagababera ma ku hagamesira.

¹⁸Gu hagamunira na enoni ni hagaparunga ma na ani ga paroparo. Suria ngaira ka guharira na enoni koro, ma ka purira so i ano.

¹⁹Ga raha ma ka koro teha na mahatanga iamu tangara na enoni, ga hagahigasigo. Ngaira hato ka girarago, go koro teha, ma ko anumasira maninga na enoni, ga hagêguri togo renigo.

²⁰Igo ko bâsurira i pasimu ma ko pinihira tenigi na katoha iata na merongata. Igê na marungamu igo ko anumasira tenigi na katoha iata na merongata.

²¹Ka visia raha na Araha! Ngaia ki takuiê bâraha tare, matena na merongaku ka rihiê ma ka tahariê.

²²Inê kê magu, ma kê vi ma i obaku, vi ngaia ki bani kasi reniê. Ma ngaia ki aganaria hete na avarasiha iaku.

²³Mu takuia na Araha, igamu na kariana mu toto suria. Na Araha ki marungira na enoni, ga koro ma oto i maana. Ma ngaia ki hagaitangira maninga na enoni, ga hagarahasira mareta.

²⁴Mu ramoramo ma kamu nganganihaga, igamu hato na enoni mu naasia na Araha.