Read Kahua KI 32 Bible Online

KI 32 - Kahua bible

KI 32

¹[២៩] Ga babarisi na enoni, God ki bonotenigi na tasi iata ma na parongata era.

²Ga babarisi na enoni, na Araha ki visira, viga matarotaro, ma ki mareha na hagaparunga i pasita.

³Matena gê pe angitenigi na tasi iaku, inê ki mangusi na apeku, suria gê gegege igê na tangiani hagenani.

⁴Igo ko hagaitangiê, Araha, igê na tangiani ma na bungiani. Ki meme bâraha na apeku, manga vi sinariê bâraha na arito.

⁵Minê kê visigi mataha na tasi iaku tangago, Araha, ma inê kê pe pinihigi na ginoku era. Inê kê vi i obaku, kê ki: “Araha, inê be hagarongogo renigi na tasi iaku.” Ma igo ko bonotenigi na parongaku era hato.

⁶Tahema i tuguhira na enoni, ga tê viteamu, viga avarasigo igê na mamasiaganiha iata. Naka ma na eraha ki manga na maganuha raha, i asa, vige tarahura.

⁷Inê kê ahi ma kê tahi i pasimu. Igo ko anumasiê tenigi na bagabevoani. Inê kê ngere raha renigo, na tahingaku, suria igo ko anumasiê.

⁸Na Araha ki vi: “Inê be hagesurigo renia na tara, i tuguhigo. Inê be hagaotogo, ma be bêngenigo.

⁹Siana ko bagatatako manga na hosi se na tonki. Na enoni ka hagaotora renigi na varo i harata, hanana vige têtê viteata.”

¹⁰Na enoni era ka page hatamigi na mamasiaganiha. Ma na Araha ki anumasira ma ki takuira tare na enoni, ga raruni togo renia.

¹¹Igamu na enoni koro ma oto, mu vagevagesia na Araha, ma kamu obakoro. Igamu na enoni, mu tê viteana na Araha, mu vagevage ma kamu ngerengere renia na korohana.