Read Kahua KI 33 Bible Online

KI 33 - Kahua bible

KI 33

¹Igamu hato na enoni koro mu vagevagesia na Araha. Igamu hato na enoni, mu tê viteana, mu visia raha renigi na mahatanga iana.

²Mu visia raha na Araha, matena mu kiria henigi na ukelele. Igamu kamu kiria henigi na gita na varo tangahuru.

³Mu kiria na ki haoru tanga. Mu tarugigi bâkoro na gita ma kamu ngerengere.

⁴Na tamasinga iana na Araha ka monari. Ngaia ki hagamonarigi renigi na tagaraha iana.

⁵Na Araha ki takuigi na marâ, ga koro ma ka oto. Ma na maveta ki hagabângenia, vi na Araha ki takuigia tare ma tarema.

⁶I tamasi ma na Araha, ma na vavearo ki vora me. I tamasi ma na Araha, ma ka vora me na arito, na hageha ma na higu.

⁷Ngaia ki nakagi haku na asi hato igê na agua gi tage manga igê na maraguhu raha. Ngaia ki nakagi na rutuni na asi aberabera igê na atohani.

⁸Igamu hato mu mauri i maveta hagenani, mu hagahigasia na Araha. Igamu hato na enoni i maveta, mu hanetasia.

⁹Suria na maveta ma na marâ hato ka vora me renigi na tamasinga iana.

¹⁰Na Araha ki hagabarasigi na katoha iata na enoni, ga pe tongesuria. Ngaia ki urapusira na enoni era, ka pe katogi na katoha iata.

¹¹Ma na katoha ma na takoha iana ka goga hete tare ma tarema.

¹²Ga babarisi na enoni, na God iata ki na Araha. Ga babarisi na enoni, God ki bani atera tanga ngaia marena.

¹³Na Araha tenia i pasina ngaia ki hahutugira so na enoni hato.

¹⁴Tenia na atohana ngaia ki bâsira vato na enoni hato, ga goga i maveta.

¹⁵Ngaia ki katogi na parongata hato, ma ki giraragi na ara ni tauhata hato.

¹⁶Na maneraha ki tahitahi, mareha vi suria ga rako teha na mane ni me iana. Na mane ni me ki tahitahi, mareha vi suria na raramohana raha marena.

¹⁷Na hosi ni hearihatana ki asa iata, vige katora na enoni, ke tehateha. Na raramohata raha na hosi ni me ki asa, vige hagatahira na mane ni me.

¹⁸Na Araha ki bâsurira na enoni, ga hanetasia. Ngaia ki marupera na enoni, ga hagêguri togo renia na takuiha iana, i goga tare ma tarema.

¹⁹Ngaia ki hagatahira tenia na mera, ma ki hagangêra igê na mateni ni magêha.

²⁰Igia ka raruni togo renia na Araha. Ngaia ki anumasigia ma ki tamanigia.

²¹Igia ka obakoro renia, ma ka hagêguri togo renia God raramohaga hunia.

²²Igami kami nungigo, Araha, ko takuigami tare, suria mi hagêguri togo renigo.