Read Kahua KI 34 Bible Online

KI 34 - Kahua bible

KI 34

¹[៣០] Inê be visia koro na Araha tare ma tarema. Inê be visia raha, ki bê ki arâ.

²Inê be ageage renia na Araha, hanana na enoni, ga hatamigi na mamasiaganiha, ka rongoa ma ka vagevage renia.

³Igia haku ka hagarahasia na Araha, ma ka kasia akê, ki rongo raha na atana.

⁴Inê kê avarasia na Araha, ma ngaia ki aganariê. Ngaia ki hatungigi teniê na ara ni maguha iaku.

⁵Igamu na enoni mu hatamigi na mamasiaganiha, mu raruni togo renia na Araha, ma kamu vagevage. Suria i asa, vigamu maki ma kamu raruni suka renia.

⁶Na enoni matareha ka avarasia na Araha, ma ngaia ki aganarira, ma ki hagatahira tenigi na mamasiaganiha hato iata.

⁷Na enoni, ga hanetasia na Araha, na angero iana ki anumasira, ma ki hagatahira tenigi na mamasiaganiha.

⁸Mu hakunia na Araha, ma kamu page girara, vi ngaia ki koro teha. Ga babarisi na enoni, ga ahiahi i pasina.

⁹Igamu hato na kariana na Araha, mu hanetasia, suria na enoni, ga tê viteana, ka pe bagubaguruga.

¹⁰Na o vasiga ka magê, suria i marehasira na ngêra. Ma na enoni, ga tê viteana na Araha, ki pe marehasira ta na marâ koro.

¹¹Igamu na bagenuni, mu karingê. Inê be hagesurigamu, hanana mu hanitasia na Araha.

¹²Mu obania vari, vigamu vagevagesia na ogaha? Mu obania vari, vigamu mauri arihu, ma kamu vagevage?

¹³Vikê siana kamu tamasi erasira na enoni, ma siana kamu hagaparu.

¹⁴Mu murisigea na eraha, ma kamu aharia na koroha. Mu tagara tanga na marapeha i mêrihami hagenani.

¹⁵Na Araha ki marupera na enoni, ga tê viteana, ma ki aganarigi na avarasiha iata.

¹⁶Na Araha ki urapusira na enoni, ga tanu era, ma ki mareha ngavê ta na enoni i maveta, vige page takusira nikâ.

¹⁷Na enoni, ga koro ma ka oto, ka avarasia na Araha. Ngaia ki aganarigi na avarasiha iata, ma ki hagatahira tenigi na mamasiaganiha hato iata.

¹⁸Na Araha ki tamanira na enoni, ga mameaga, ma ki hagatahira na ani ga raruni era.

¹⁹Na enoni matarotaro ka hatamigi rako na mamasiaganiha, ma na Araha ki hagatahira tenigi hato.

²⁰Na Araha ki marupera bâkoro era, ma ngaira ka komaga ngavê.

²¹Na eraha ki page nahuira ngavê na enoni, ga erataga. Na hagaitangiha ki page tarahura na enoni, ga kikitenira na ani ga matarotaro.

²²Na Araha ki page hagatahira na kariana, ma ki page surira oto na enoni, ga gavagava vê i pasina.