Read Kahua KI 37 Bible Online

KI 37 - Kahua bible

KI 37

¹[៣៣] Siana ko tako renira na enoni era. Siana ko hengarira na ani ga tanu era.

²Ngaira ka page magahuru, mangagi na go ga maria. Ngaira ka page meme, mangagi na rauga ga mêgu.

³Gu hagêguri togo renia na Araha, ma ku paronga koro. Gu tanugi na marâ, ga koro, hanana go gâga tatara igê na marê ni suruha.

⁴Gu vagevagesia na Araha, ma ngaia ki page vatego na marâ, go barigigi bâraha.

⁵Gu hagêguria na Araha renigo. Gu raruni togo renia, ma ngaia ki page tamanigo.

⁶Ngaia ki page katoa na otoha iamu, ki togatoga manga na arito igê na ritovagana.

⁷Gu naasia na matena iana na Araha, ma ko piringiape. Siana ko tako renira na enoni igê na ramana iata. Siana ko hengarira na enoni, ga tavoraha maninga igê na katoha era iata.

⁸Siana ko mangariaga, ma siana ko naka na siva. Siana ko takoha bâraha, hanana vi go tahitahi tenia na eraha.

⁹Na enoni, ga hagêguri togo renia na Araha, ka page nahunia na agua ni suruha. Ma ngaia ki page paira hura na enoni, ga erataga, tenia.

¹⁰Na enoni era ki sugia ma, vige magahuru. Go page garira, ma ki asa, vigu page tarahura.

¹¹Ma na enoni haritagi hete ka page nahunia na agua ni suruha. Ngaira ka page vagevagesigi na ramana ma na marapeha.

¹²Na enoni era ka harikato renira na enoni koro ma ka kurukuru rivo tangara.

¹³Ma na Araha ki rurusira na enoni era, renia ngaia ki girara, vi ngaia ki sugi hagaitangira hagetage.

¹⁴Na enoni era ka amurigi na tatapa borahu iata, ma ka rohegi na epage iata. Ngaira ka nanê, viga nahuira na enoni, ga matareha ma ka baguru. Ngaira ka nanê, viga hagamesira na enoni, ga paronga koro ma oto.

¹⁵Ma ngaira hete ka page meme renigi na tatapa borahu iata mareta, ma ka page baro na epage iata.

¹⁶Na kere nahuninga iata na enoni koro ka teharigi na ruruguha iata na enoni era.

¹⁷Renia na Araha ki page hagamesigi na raramohata na enoni era. Ma na enoni, ga koro ma ka oto i maana, ngaia ki page hagaramonira, ma ki page anumasira.

¹⁸Na Araha ki marupera na enoni matarotaro, ma ngaira ka page nahunia na agua ni suruha tare ma tarema.

¹⁹Ki asa iata, vige hatamigi na mamasiaganiha igê na bagabevoani. Ma igê na matena na magêha raha ngaira ka page nahunigi na ngêra rako.

²⁰Ma na enoni era hete ka page meme. Na merongana na Araha ka page magahuru, mangagi na takani na mahe, ga maugu. Ngaira ka page magahuru, mangagi na roboni na gi, ga aru makaka.

²¹Ka katora hagaba na enoni era, ma ki asa, vige barubaru. Ma na enoni koro hete ka mamahata, ma ka pe naasigi na baruni.

²²Na enoni, ga koro ma ka oto, na Araha ki page haganahunira renia na agua ni suruha. Ma na Araha ki page hagaitangira na ani era, ma ki page paira hura tenia.

²³Na Araha ki bêngenira na enoni tanga na agua, i tuguhira. Ngaia ki anumasira na enoni koro, ga hagakoro obana.

²⁴Naka ma ngaira ka votavota, i asa iata, vige tâ so tare, suria na Araha ki page ragera akê.

²⁵Tenia gê sisite mataro me gê gemêa i ngekê, inê kê pe bâsia noga na Araha, vige pania na enoni, i tê viteana. Suria na mêrihaku hagenani inê kê pe bâsira noga na karena na enoni koro, vige avarasi ngêra.

²⁶Na enoni koro ki mamahata tare, ma ki vatera na hagaba na enoni getera, ma ki ageage renira na karena.

²⁷Gu murisigegi na eraha ma ku paronga koro, hanana na raraha iamu ki goga tare igê na agua ni suruha.

²⁸Na Araha ki barigia na otoha, ma ki asa, vige panira na kariana, ga toto suria. Ngaia ki page anumasira tare na raraha iata na enoni, ga tê viteana. Ma na raraha iata na enoni era ngaia ki page paira hura tenia na agua ni suruha.

²⁹Ma na enoni, ga tê viteana na Araha, ka page nahunia na agua ni suruha, ma ka page oga igê tare ma tarema.

³⁰Na tamasinga iata na enoni koro ka rongo mataha, ma na vita iata ka koro ma oto tare.

³¹Na ramata iana God ka nganganihaga igê na aitangihata, ma ki asa iata, vige page aharêngigi.

³²Na enoni era ka hahutugira na enoni koro, ma ka uhungia, viga nahuira ka meme.

³³Ma na Araha ki asa, vige panira tangara na merongata, hanana vige surira hagaitangira, matena ga hagatamasira.

³⁴Gu naasia na Araha, ma ku marupegi na ramata iana. Ngaia ki page kasigo akê, suria i page haganahunigo renia na agua ni suruha. Ma igo ko page bâsia na Araha, i page paira hura na enoni era tenia.

³⁵Inê kê bâsia ta na mane, i pe botage renia na Araha, ma ki erasira ngavê na enoni. Ngaia ki hagarahasia marena, manga na bagapinige raha igê na hungani i Libanone.

³⁶I muri me inê kê ri i ngekana ma ngaia ki bani magahuru. Inê kê bâbâ renia, ma ki asa, be bâsia.

³⁷Gu bâsira na enoni matarotaro, ma ku hahutugira na enoni, ga tê viteana na Araha. Na enoni, ga haritagi, ka nahunira na raraha iata.

³⁸Ma na enoni, ga aharêngigi na ramata, ka page meme ngavê, ma na raraha iata ka page magahuru hagetage.

³⁹Na Araha ki hagatahira na ani ga matarotaro. Ngaia ki anumasira igê na mateni na bagabevoani.

⁴⁰Ngaia ki tamanira ma ki ramoramo pusira ma ki hagatahira tenigi na eraha. Ngaia ki anumasira, suria ngaira ka gava râ i pasina.