Read Kahua KI 39 Bible Online

KI 39 - Kahua bible

KI 39

¹[៣៥] Inê kê vi i obaku, kê vi: “Be hinahinaru, hanana siana ki hagatasiê na meaku. Inê kê pe visia ta na marâ, matena ga goga na enoni, ga pe tongesuria God na Araha.”

²Inê kê muni ma, ma kê pe tamasi rârâ. Inê kê pe visia rârâ ta na marâ koro nikâ. Ma na mamasiaganiha iaku ki aharêsiê ngavê,

³ma kê anumanuma bâraha. Inê kê takotako bâraha, ma na anumanumaha ki raharaha nikâ. Memuri inê kê tamasi, kê hagate vikê:

⁴“Araha, gê gâga arihu mênga vari? I na keta inê kê page meme igê? Visia me na matena, gê page magahuru igê.”

⁵Igo ko katogi tani ma na kikihuni na mauriku. Tangago igo na mêrihaku ikê ki pe raha. I monari, na mêrihata na enoni i maveta ka manga na kere manavasua gi tage ma,

⁶manga na nununa i ritare. Na marâ ma i katoa, ngaia ki tagara pura ma! Ngaia ki tonganigi na ruruguha, ma ki pegirara, vi o ti ki page nahunigi.

⁷Ma na ta ma be naasia, Araha? Inê kê raruni togo renigo hete.

⁸Gu bonotenigi na ginoku era, ma ku hagakomagê. Siana na enoni, ga pe hinaru, ka meêmarabe.

⁹Inê be muni, ma be pe tamasi rârâ, suria igo nga ko hagamamasiagê vikana.

¹⁰Siana ko ama ni hagaitangiê nga. Inê kê sugi meme noga, suria go tahuruê.

¹¹Igo ko ramonia na enoni renigi na ginona era, ma ko hagaitangia renigi. Igo ko erasigi hagetage manga na hasikoko na marâ manimani iata na enoni. I monari, na mêriha iata na enoni i maveta ki manga na kere manavasua gi tage ma.

¹²Araha, gu aganaria na nunginungi iaku, ma ku karinga na angiha iaku. Gu tamaniê, matena gê angiangi. Inê kê ri i pasimu mangara na uvariku hato.

¹³Gu nakê so inê, hanana ve vagevage sisite i nago tarana gê magahuru ma kê meme.