Read Kahua KI 40 Bible Online

KI 40 - Kahua bible

KI 40

¹[៣៦] Inê kê piringiape, ma kê naasia na Araha, ki tamaniê. Ngaia ki karingê, ma ki aganaria na angiha iaku.

²Ngaia ki okeê akê tenia na kiru ni mera, tenia na sugusugu ni mera. Ngaia ki hagêrasiê igê na agua mamata, ma ki katoê, kê ape tatara.

³Ngaia ki hagesuriê renia na ki haoru, hanana gê kiria igê God iaku, ma kê visia raha. Rako na enoni, ga rongoa, ka page konekone, ma ka page hagêguri togo renia na Araha.

⁴Ga babarisi na enoni, ga raruni togo renia na Araha, ma ka pe hagarapera na ataro, se ga hakunira na ani, ga vogasira.

⁵Araha God iamami, igo ko bani hagarakonigi na tagaraha koro tangagami. Igo ko bani hagarakonigi na katoha koro tangagami. Ngaigi hato ka rako teha, ma ki bara, ve tomanigi. Igo getego ma ko teha!

⁶Igo ko pe obanigi na vogasiha ma na votovoto, se ga vogasigo renigi na puruka se na sipi, ga sungigi igê na bea ni vogasiha. Igo ko usitenigi na vogasiha tanga na bonoteniha na tasi. Ma igo ko obaniê hete, vigê têtê viteamu.

⁷Tahema inê kê arami, kê vi: “Inê ikê. Na tamasinga iamu tangê ka goga igê na buka ni ramata.

⁸Inê kê mage ni râ surigi na obaniha iamu. Na hagesuringa iamu ki nganganihaga igê na aitangihaku, God iaku.”

⁹Matena na kariamu hato ka hagarahe haku, inê kê tarohenia na taroha koro renigo, vigo hagatahigami, Araha. Igo ko bani girara, vi inê kê ama ni tarohenia tare nga na taroha koro renigo.

¹⁰Inê kê pe munia so tangê mareku na taroha renia na tahinga. Inê kê bani tamasigi mave tare na monariha ma na hetamaniha iamu. Matena na kariamu hato ka rotu haku, inê kê pe muni tenia ni visigi na monariha ma na takuiha tarema iamu.

¹¹Araha, inê kê bani girara, vi igo ko ama ni takuiê tare nga. Na takuiha ma na monariha iamu karu page marupeê ma karu page anumasiê tare.

¹²Rako na eraha ka rihiê. I asa be tomanigi. Na ginoku era ka rubuhiê. Ma ki asa be bâbâ. Ngaigi ka rako teharigi na varehu i bêku, ma kê pe hagêguri togo.

¹³Gu hagatahiê, Araha! Gu tamaniê i ngekê!

¹⁴Na enoni ka rapasia, viga nahuiê kê meme. Gu teharira ma ku hagamakira ngavê, hanana ga raruni suka. Ngaira ka rapasia, viga erasiê. Gu paira ma ku hagamakira.

¹⁵Ngaira ka rurusiê. Gu katora, ke tangahurira, suria ga pe teha.

¹⁶Go katora na enoni, ga tari surigo, ka vagevage ma ka obakoro. I ararira, ga visigo koro, renia go hagatahira. I ararira, ga vivi tare: “Na Araha i teha!”

¹⁷Inê kê bagubaguruga ma kê matareha, ma igo, Araha, ko pe bonoteniê. Igo ko tamaniê ma ko hagatahiê. Siana ko kakaviaga, God iaku!