Read Kahua KI 44 Bible Online

KI 44 - Kahua bible

KI 44

¹[៣៩] God, igami maremami kami bani rongoa, ma na uvarimami ka bani hagarongogami renia nikâ. Igê na matena iata i nago kere vê noga igo ko bani tanugi tangara na tagaraha raha.

²Igo maremu ko paira hura tenigi na mako iata na enoni, ga pe tongesurigo, ma ko haganahunira na kariamu renigi. Igo ko hagaitangira na enoni, ga pe tongesurigo ma na kariamu ko vatera renia na ramana.

³Na kariamu ka rêgi na mako, mareha vi surigi na tagaraha iata mareta. Ngaira ka tehateha, mareha vi surigi na raramohata mareta. Ngaira ka tehateha hete renigi na raramohamu ma na marungamu, ma suria go tamanira ma ko takuira.

⁴Igo ki na Araha iaku ma na God iaku. Igo ko katora ka teha na kariamu.

⁵Igê na raramohamu igami kami teharira na merongamami.

⁶Inê kê pe hagêguri togo renia na epage iaku, se na tangaruha iaku, vige hagatahiê.

⁷Ma igo nga hete ko hagatahigami tenira na merongamami. Igo ko katora, ka tugupu na ani, ga kitenigami, suria ga pe teha.

⁸Igami kami ageage tare renigo ma kami page hagarahasia tare na atamu.

⁹Ma i ngekê igo ko bani kasi renigami. Tahema mi pe teha. Ma ki hato, vigu bêngenira na rehagaro na mane ni me iamami.

¹⁰Tahema igami kami gavagava tenira na merongamami, ma ngaira ka raugi na nahuninga iamami.

¹¹Igo ko bani hagamarumungenira na merongamami, ka nahigami, manga vi igami ka na sipi. Igo ko bani tokorenigami, kami mamahuara i pasita na enoni, ga pe tongesurigo.

¹²Igo ko bani hagavuringenira na kariamu renia na mena, i sisite, manga vi ngaira ka na marâ purua.

¹³Vikê ka guharigami na enoni, mi oga henira. Ngaira ka rurusigami, ma ka hagakokohara tangagami.

¹⁴Igo ko bani katora na enoni i na agua getegi, ka tamasi erasigami, ma ka karikarige bê renigami.

¹⁵Inê kê tangahuriê tare, ma ki makitaga ngavê na apeku.

¹⁶Inê kê ruruhi renigi na guhata iata na merongaku ma renigi na tamasinge ngurunguru iata na enoni, ga ruhiê.

¹⁷Na ara ni tarani ngegê ka tarahugami, naka ma igami kami pe bonotenigo, se vigami aharê igê na suruheri iamu.

¹⁸Igami kami toto surigo tare, ma kami pe guguruga igê na ramata iamu.

¹⁹Igo ko bani rumakaka renigami, ma igami kami nagia ve renigo i guputa na o vasiga. Igo ko bani panigami igê na roto hono.

²⁰Manga mi pe rahesigo, God monari, ma kami hagarapera ma na ataro, igo ko pe hitenia.

²¹Renia igo ko giraragi na takotako iamami, ga pinihi i obamami.

²²Suria renigo igo tahema ga nahuigami tare ma ka nahigami, manga vi igami ka na sipi.

²³Araha, gu rite! Renia ta go mêru? Gu aharaga! Siana ko kasi renigami ngavê!

²⁴Renia ta ko murisigegami? Gu takusigi na mamasiaganiha iamami ma na anumanumaha iamami.

²⁵Igami kami vota, kami gaha renigami i ano, ma kami abahigi na mamaami.

²⁶Gu hata ni tamanigami! Gu hagatahigami, suria go takuigami tare.