Read Kahua KI 45 Bible Online

KI 45 - Kahua bible

KI 45

¹[៤០] Na tamasinga bâkoro ka râ me tenia na aitangihaku, matena gê baro ki renia na maneraha. Na meaku ki manga na ringena na enoni, i barobaro ki bâkoro.

²Igo, maneraha, go bâkoro teharira na mane hato. Igo na mane koro ni tamasinga, suria God ki korokoro tare tangago.

³Gu hugusigo maremu renia na hogosimu, henia na tatapa borahu, maneraha raramohaga hunigo. Igo ko bâ huhungataga bâraha, ma ko bâ hahaneaga ngavê.

⁴Gu tagiria na hosi ma ko huhungataga, manga na maneraha iata na mane ni me, i tehateha igê na henahuita. Gu gatagatanigi na monariha ma na otoha ma na marâ, ga koro ma ka haritagi. Igo ko page hagabângenia na raramohamu raha, ma ko page hagakonera ma ko page hagamagusira na enoni, suria igo ko page teha.

⁵Ga masi ngavê na mage iamu. Ngaigi ki takegi na bunaniata na merongamu. Na enoni, ga pe tongesurigo, Araha, ka susure ma ka bêrusu i maamu.

⁶Na arahanga, God ki bani vatego renia, ki page gâga tare ma tarema. Igo ko marungira na kariamu igê na tarani, ga oto.

⁷Igo ko barigigi na tarani, ga koro ma ka oto, ma ko kitenigi na tarani, ga era. Tahema na Araha, God iamu, ki bani monego, ko maneraha. Ngaia ki ringia hurigo na ramana teharira na maneraha getera.

⁸Na tuguni iamu ka sigini koro renigi na aeni na apinige na mira ma na apinige na aloe, ma na ago. Na ruma raha iamu ka hagamahegi renigi na rivoni na ega ma na bêni manu. Ma na ringeni na gita i pasimu ka hagakoro obamu.

⁹I berarogata na gete raha i pasimu ka goga igê na kareta na maneraha. Kaniamu ki oga so henigo igê na atohamu, ma ki rêni renigi na golo taranini.

¹⁰Igo, kaniana na maneraha, gu rongo ma ku karingê. Siana ko takusira na kariamu ma na goamu.

¹¹Na maneraha ki obanigo suria na bâkorohamu. Ki tuguhigo, go toto suria, suria ngaia ki na araha iamu.

¹²Na ai ni Taire ka page mahata tangago. Na ani, ga ruruguha i berarogata na enoni, ka page nakanaka bêta tangago.

¹³I ruma raha iana na maneraha ki goga na gete iana. Ngaia ki bâkoro teha renigi na rêni. Na tuguni iana ka tura igê na mahe na golo

¹⁴Ngaia ki tuguni renia na tuguni reoreoga. Ka merâ tanga na maneraha. Na tamana na kere gete ka takua, ma ka tage râ tanga na maneraha.

¹⁵Ngaira ka obakoro ma ka vagevage, matena ga banu i ruma raha iana na maneraha.

¹⁶Igo, maneraha iaku, ga page rako o karemu. Ngaira ka page heheuri ka maneraha. Igo ko page hagêgurira, ka marungia na maveta hagenani.

¹⁷Na ki iaku ki page katoa na atamu, ki rongo raha tare ma tarema. Ma na enoni hato i maveta ka page hagarahasigo tare, ki bê ki arâ.