Read Kahua KI 48 Bible Online

KI 48 - Kahua bible

KI 48

¹[៤៣] Na Araha God iaka ki teha. Ki tuguhira na enoni hato i hinua iana, ga rahesia igê na hungana apuna iana.

²Sione, na hungana iana na Araha, ki akê ma ki bâkoro era. Na hinua raha iana na maneraha, i teha, ki hagakoro obata na enoni hato i maveta.

³God ki hagabângenia, vi ngaia ki anumasira na kariana i raroni na ruma nganganihaga i hinua raha.

⁴Na maneraha i maveta ka harikato ma ka haku, hanana viga hagasuhia na Hungana Sione.

⁵Ma na matena ga rigia Sione, ngaira ka konekone, ka magu ma ka gava.

⁶Ngaira ka para ma, ma ka magu ma ka tata, manga na gete i riki na gerina.

⁷God ki hatungia na raramohata, manga na asi ramo i korogi na haka.

⁸I nago igia ka rongoa ma na raramohana God na Araha. Ma i ngekê igia ka kahu bâsia i hinua raha iana na God iaka. Na Araha raramohaga hunia ki page anumasia na hinua raha iana tare, ki bê ki arâ.

⁹God, i rarona na Ruma ni Rotu iamu igami kami takusigo, go takuigami tare, mareha ki hatohato.

¹⁰Na atamu ki rongo raha i maveta hagenani, ma na enoni hato ka hagarahasigo, suria ga oto na tauhamu.

¹¹Na enoni i hungana i Sione ka vagevage. Na enoni surigi na hinua raha i Juta ka obakoro renigi na suriha oto iamu.

¹²Kariana God, mu râhia i Sione, ma kamu tomanigi na bebetehe.

¹³Mu haharirigi na para ma na ruma nganganihaga, hanana mu hagagirarara na raraha haoru iami renigi.

¹⁴Mu hagarongora ma kamu vivi: “God ngekê ki na God iaka tare ma tarema. Ngaia ki page bêngenigia, ki bê ki arâ.”