Read Kahua KI 49 Bible Online

KI 49 - Kahua bible

KI 49

¹[៤៤] Mu karingê, igamu hato! Mu rongo, igamu na enoni hato i maveta!

²Igamu na enoni raha ma na enoni purua. Igamu na enoni rurugua, ma igamu na enoni matareha nikâ.

³Inê be visigi na takoha mataha iaku. Inê be tamasi igê na giraraha.

⁴Inê be takusigi na maramarêrava, ma be ramatenigi, matena gê tarugia na gita iaku.

⁵I asa be magu matena na bagabevoani, matena ga rihiê na merongaku.

⁶I asa be magutenira na enoni era, ga raruni togo renigi na ruruguha iata, ma ka paroparo renigi na nahuninga raha iata.

⁷I asa ta na enoni, vige vuripusia marena. Ngaia ki asa, vige vuria tenia God na mêrihana.

⁸Renia na mena na mêrihana na enoni ki raha teha ngavê. Na mena, i girara i vuria renia, ki mareha ngavê, vige araria.

⁹Na mena ki pe uhu, hanana vige hagatahia tenia na kiru, ma ke katoa, ke mauri tarema.

¹⁰Igia hato ka bani girara, na enoni hato ka page meme. Ka page meme na ani, ga bagatatako ma ka tugupu, ma na ani ga tako mataha, nogata. Ngaira hato ka page panigi so na ruruguha iata tangara na kareta ma na goata.

¹¹Na anoanota ka na hinua iata tare. Ngaira ka goga tare i ngekana, ki bê ki arâ, naka ma ga bani nahunigi na mako i tagua.

¹²Naka ma na enoni, i rongo raha na atana, ngaia nikâ ki girara i meme. Ngaia ki page meme mangara na marâ purua.

¹³Mu bâsia na tarana, i tarahura na enoni, ga hagêguri togo renira mareta, ma ka tare surigi na nahuninga raha iata.

¹⁴Na Mera ki page bêngenira tangagi na anoanota, manga na mane i bâsuri sipi. Ngaira ka tari oto râ igê na kiru, ma na gahuata ka hata ni kakaga. Na agua, ga goga igê na enoni, ga bani me noga, ki na hinua iata nogata. Ma na enoni, ga koro ma ka oto, ka page aharaga igê na mahogotana.

¹⁵Ma God ki page hagatahiê nikâ tenia na raramohana na mera.

¹⁶Siana kamu anumanuma, matena mu bâsia ta na enoni ki ruruguha, ma na nahuninga iana ka ama ni raharaha nga.

¹⁷Ngaia ki asa, vige migirâ henia, matena i meme. Na nahuninga raha iana ki asa, vige râ henia i na kiru.

¹⁸I page me nikâ na enoni, i vagevagesia na mêrihana, naka ma i rongo raha na atana, renia ga tavoraha koro na tagaraha iana.

¹⁹Ngaia ki page hakunira na uvarina, ga bani me ma ka goga igê na roto hono tarema.

²⁰Naka ma na enoni, i rongo raha na atana, ngaia nikâ ki girara i meme. Ngaia ki page meme mangara na marâ purua.