Read Kahua KI 5 Bible Online

KI 5 - Kahua bible

KI 5

¹[៣] Araha, gu rongogi na viteaku, ma ku karingagi na tamasinga iaku.

²Araha God, gu aganaria na nunginungi iaku, matena gê avarasigo. Inê kê rahesigo, Araha.

³I mavoraro igo ko rongoa na viteaku. Igê na mahogotana inê kê vogasigo, ma kê naasia na aramiha iamu.

⁴Igo nga na God, go ngaritenigi na tasi, ma ko usitenigi na eraha.

⁵Igo ko marakorotenira na enoni paroparo, ma ko kitenira na enoni era hato.

⁶Igo ko nahuira ngavê na enoni ni hagaparunga. Igo ko bâ so renira na enoni, ga henahu ma ka hagahagaparu.

⁷Ma renia igo ko takuiê ngavê, inê kê girara gê rahesigo i ruma apuna iamu. Inê kê bêtuhigo ma kê hagahigasigo i ruma ni rotu iamu.

⁸Araha, na merongaku ka rako teha! Gu hagaotoê, be tanugi na obaniha iamu. Gu mavesia na obaku renigi na katoha iamu, hanana gê arâ surigi.

⁹Ki pearari, vige tongesurigi na marâ, ga visigi na merongaku. Ngaira ka takusigi ma na eraha, ma ka banagi na tamasinga iata. Ngaira ka nakanaka bêta bâraha, ma na hagaparunga iata ka erasira ngavê na enoni.

¹⁰God, gu hagaitangira, suria ngaira ka erataga. Gu katora, ka tutu mareta igê na hagaparunga iata. Gu paira hura tenigo, suria ngaira ka tasi ngavê, ma ka urapusigo.

¹¹Na enoni hato, ga tarahua na tahinga i pasimu, ngaira ka page obakoro. Ngaira ka page kiki tangago, suria ga vagevage ngavê.

¹²Araha, igo ko korokoro tangara na enoni, ga têtê viteamu. Igo ko takuira ma ko anumasira manga na bêata.