Read Kahua KI 50 Bible Online

KI 50 - Kahua bible

KI 50

¹[៤៥] Na Araha God raramohaga hunia ki tamasi. Ngaia ki hagahakura na enoni hato tenigi na ara ni agua hato i maveta.

²Ngaia ki hura me tenia i Sione, tenia na hinua, i bâkoro teha ngavê, manga na arito i raboa.

³Na God iaka ki pe arâ me munimuni. Na angihuhuna na gi ki nanago tarana, ma na roga raha ki arâ rihia.

⁴Ngaia ki hagatorarerua na vavearo ma na ano, karu hahutugia, i surira na kariana.

⁵Ngaia ki vi: “Muru hagahakura me na kariaku koro, ga bani surua, viga têtê viteaku, ma ka hagagatagatania renia na vogasiha.”

⁶Na vavearo ki hagagirarara na enoni renia vi na suriha iana God ka koro ma ka oto tare.

⁷“Kariaku, mu karingê, gê tamasi. Inê be ranganigamu, Isiraelita. Inê God nga, na God iami.

⁸Inê kê pe ramonigamu renigi na vogasiha iami, suria igamu kamu susu tare tangê.

⁹Naka ma, ma inê kê pe obanira na puruka mane tenigi na pena iami, se na goti tenira na totoha na goti iami.

¹⁰Na ara ni marâ hato, ga mauri i bemu, ka na aniku, ma nikâ na puruka hato igê na rehagaro na hungani.

¹¹Na ara ni manu hato ka na aniku, ma nikâ na marâ hato, ga mauri igê na bena.

¹²Manga ve magê, i asa be nungigamu renigi na ngêra. Suria na maveta ma na ara ni marâ hato i rarona ka na aniku.

¹³Inê kê ngaua vari na hasigona na puruka mane, se gê tonomia vari na gaputa na goti?

¹⁴Mu vogasia God renia na visiha koro, ma kamu hagamonaria na suruha iami tanga na Araha.

¹⁵Mu avarasiê, matena ga tarahugamu na bagabevoani. Inê kê page hagatahigamu, ma igamu kamu page hagarahasiê.”

¹⁶Ma God ki vi vikê tangara na enoni, ga pe tê viteana: “Renia ta mu pasi visigi na ramata iaku, ma kamu pasi tamasia na suruheri iaku henigamu?

¹⁷Igamu kamu usiteniê, vigê hagaotogamu. Igamu kamu kitenigi na ramata iaku.

¹⁸Igamu kamu tari surira tare na enoni hanago, ma kamu hakunira na enoni, ga gamogamo.

¹⁹Igamu kamu tamasi era ma pe oto tare, ma kamu pe makuku, vigamu hagaparu.

²⁰Igamu kamu tugurira na goami, ma kamu torahurira.

²¹Igamu kamu bani katogi na tarani ngegê, ma inê kê pe visigamu. Tahema igamu kamu vi ma, vi inê kê manga igamu. Ma i ngekê nga inê kê ramonigamu, ma kê ranganigamu.

²²Igamu, mu guguruga, mu karinga, ma kê tê erasigamu manga na o vasiga, ma ki asa ta na enoni, vige hagatahigamu.

²³Na enoni, ga vogasiê renia na visiha koro, ngaira ka hagarahasiê. Na enoni hato, ga têtê viteaku, inê be hagatahira nga.”