Read Kahua KI 51 Bible Online

KI 51 - Kahua bible

KI 51

¹[៤៦] God, gu takuiê, suria na takuiha iamu ki goga tarema. Gu taruhigi vê na tasi iaku, suria na takuiha iamu ki raha teha.

²Gu tananigi vê na ginoku era hato, ma ku katoê, be matarotaro tenia na parongaku era.

³Inê kê ranganiê mareku, vi inê kê tasi. Inê kê tangahuriê tare renigi na ginoku era.

⁴Inê kê bani tasi pusigo igo. Inê kê bani katoa na tarana, i era i maamu. Tahema ki oto tangago, go suriê. Ki oto tangago, go hagaitangiê.

⁵Na eraha ki bani tarêhiê, matena gê vora me. Matena kenaku ki atuingeniê, na eraha ki tarahuê.

⁶Igo ko obaniê, vigê tamasi igê na monariha. Tahema gu mavesia na obaku renigi na takoha mataha iamu.

⁷Gu hagapuê, be matarotaro. Gu tananiê, be siki ahuru.

⁸Gu hagakoro obaku, be vagevage. Igo ko bani katoê, kê oba era. Gu katoê, be obakoro aporo.

⁹Gu bonotenigi na tasi iaku, ma ku taruhigi râ na ginoku era.

¹⁰Gu katoa na aitangihaku, ke matarotaro, hanana ve têtê viteamu ma be tototo surigo.

¹¹Siana ko paiê hura tenigo. Siana ko tavoa teniê na maurihamu, go vateê.

¹²Gu katoê, be vagevagesigo nikâ, suria go hagatahiê, ma ko hagaganariê, be tê viteamu.

¹³Me muri inê be hagesurira na enoni tasi, hanana ga marupegi na ramata iamu, ma ka tari surigo aporo.

¹⁴Gu hagatahiê tenia na mera, igo God na tahingaku. Ma inê kê page vagevage, ma kê agana, hanana gê tarohenia na otohamu.

¹⁵Araha, gu tamaniê be tamasi, ma be hagarahasigo.

¹⁶Igo ko pe obakoro renigi na vogasiha. Ma inê kê pe hagakoro obamu, manga ve susu tangago.

¹⁷Na vogasiha, i hagakoro obamu, ngaia ki na tê vitana. Igo ko pe usitenira na enoni, ga haritagi ma ka urisi parongata.

¹⁸God, gu korokoro tanga i Sione, ma ku tamania. Gu hagahaorungigi na para i Jerusaleme.

¹⁹Ma igami kami page hagakoro obamu, renia mi vogasigo maninga, ma kami susu tangago. Ma igami kami page vogasigo renira na puruka mane, mi sungira tangago igê na bea ni vogasiha.