Read Kahua KI 55 Bible Online

KI 55 - Kahua bible

KI 55

¹[៥០] God, gu karinga na nunginungi iaku. Siana ko murisigeê.

²Gu karingê ma ku aganariê. Inê kê ape era renigi na anumanumaha iaku.

³Inê kê magu bâraha, renia na enoni era ka hagamamasiaga apeku. Ngaira ka merongasiê ma ka kiteniê, ma ka mangariaga tangê.

⁴Inê kê magu bâraha ma kê makomo agani, suria gê anumanuma, vigê meme.

⁵Inê kê tata ngavê, suria gê magu. Inê kê kakahuru renigi na marâ era.

⁶Manga gê tonga na gagahaku manga na kuvê, vikê be gaha vê ma be mamaro.

⁷Inê be gaha hagatê ngavê, ma be oga tare igê na masusu.

⁸Inê be hata ni tarahua na agua, gê rukuruku igê tenigi na roga raha ma na tarêheroga.

⁹Araha, gu urapusigi na katoha iata na merongaku, ma ku katora, ka totora hegetigi. Inê kê bâsira, ga oga sutaga, ma katogi na perenga i hinua raha.

¹⁰Ngaira ka bagaparongata ma ka bagatarihata igê na tangiani ma na bungiani.

¹¹Na ara ni marâ hato ka tâ i ano. Igê na mahera ka ramo na hagaparuana ma na haganunuana.

¹²Manga na merongaku, ma ki rurusiê, inê kê pe gagêmaga bâraha renia. Manga na enoni, i panê tangê, ma ki tamasi erasiê, inê kê girara gê arigurigu tenia.

¹³Ma igo hete, na tamaku, na bamane ma na êraku.

¹⁴Igerua karu bani tamasi tararu heri, ma karu hagarahe haku i Ruma ni Rotu.

¹⁵I ararira na merongaku, ge me nga i ngekê! I ararira, ge so mamêrigata i pasita na enoni, ga bani me noga. Na eraha ki tarêhigi na aitangihata ma i pasita.

¹⁶Ma inê kê avarasia God na Araha, ma ngaia ki page hagatahiê.

¹⁷I mavoraro, igê na ritovagana, ma i manurahi inê kê gegege ma kê hagagege tanga God, ma ngaia ki page aganariê.

¹⁸Inê kê meraheariha na merongaku rako. Ma God ki page katoê, kê aporo, kê pe mamari.

¹⁹God, i bani araha i nago kere vê noga, ngaia ki page aganariê inê, ma ki page teharira ngaira. Renia ngaira ka usi, vige urisi parongata, suria ga pe magutenia na Araha.

²⁰Na tamaku i nago ki sugarira na tamana. Ngaia ki pe hagamonarigi na suruha iana.

²¹Na tamasinga iana ka rongo koro ngavê, ma na kiteniha ki goga igê na aitangihana. Ngaia ki hagamesigi na ringena, ma na tamasinga iana ka hagamesira na enoni.

²²Gu nakagi vê tanga na Araha na anumanumaha iamu, ma ngaia ki page marupego. Ngaia ki asa, vige katora na enoni, ga tê viteana, ke rumakaka, se vige votavota.

²³God, igo ko hagamesira rêrê na enoni ngegana, ga nahu enoni ma ka hagaparu bâraha. Tangê inê, God Araha, inê be hagêguri togo renigo.