Read Kahua KI 57 Bible Online

KI 57 - Kahua bible

KI 57

¹[៥២] Gu takuiê, God! Gu takuiê, suria gê ruku i pasimu. Inê kê ruku i pasimu, mangara na karena kua, ga rukuruku i bebena kenata tenigi na roga raha ma na rangi.

²Inê kê avarasia God, i raha teha. Inê kê avarasia God, i marupeê tare.

³God ki page aganariê, ma ki page hagatahiê, ma ki page teharira na merongaku. God ki page hagagirarê, vi ngaia ki takuiê tare, ma ki hagamonarigi tare na suruha iana tangê.

⁴Na merongaku ka rihiê. Ngaira ka mangara na o vasiga, ga ngaura na enoni. Na rivota ka masi mangagi na ora ma na mage, ma na meata ka hagamesira na enoni.

⁵God, gu hagabângenigi na bâbâhamu raha i vavearo ma na raramohamu raha i ano hagenani.

⁶Na merongaku ka tutu kariê. Inê kê anumanuma bâraha. Ngaira ka sutasuta kariê, ma ngaira mareta ka suta igê.

⁷God, inê kê hagêguri togo ngavê renigo. Inê be kirigo ma be hagarahasigo.

⁸Inê be vagevage, ma be tarugigi na gita ma na ukelele iaku, ma be hagaritea na arito.

⁹Araha, inê be visigo koro ma be kirigo i pasita na enoni, ga hitenigo.

¹⁰Na takuiha tarema iamu ki raha teharia na vavearo. Na monariha iamu ki raha teharia na bevoa i haha.

¹¹God, gu hagabângenigi na bâbâhamu raha i vavearo ma na raramohamu raha i ano hagenani.