Read Kahua KI 59 Bible Online

KI 59 - Kahua bible

KI 59

¹[៥៤] God iaku, gu hagatahiê tenira na merongaku. Gu anumasiê tenira na enoni, ga gamorahiê.

²Gu hagatahiê tenira na manero ngegana. Gu hagatahiê tenira na mane nahu enoni ngegana.

³Bâ, ngaira ka gamorahiê, hanana viga nahuiê. Na mane ramo ka haku me ka rapasiê.

⁴Araha, ngaira ka hata ni nanê kariê, mareha vi suria inê kê tasi, se ve katoa ta na marâ, i era se pe oto.

⁵Garigari, Araha God raramohaga hunigo. God, ga rahesigo na Isiraelita, gu tamaniê, suria igo ko bani girara. U râ ku hagaitangira na enoni, ga pe rahesigo. Siana ko takotako herua renira na manero, ga katogi na eratana.

⁶Ngaira ka aporo me i manurahi. Ngaira ka hagahoto i hinua raha, manga na totoha ni o, ga ngerengere ma ka angiangi.

⁷Bâ, ngaira ka guhaguha ma ka hagamakuku. Na meata ka mangagi na gira. Ma ngaira ka vi ma, vi mareha ta na enoni, vige rongora.

⁸Araha, igo ko mamana tenira. Igo ko kitakitara na enoni, ga pe rahesigo.

⁹Inê kê raruni togo renia na raramohamu. God igo ki na tahingaku.

¹⁰God iaku, igo ko takuiê, ma ko page tamaniê. Igo ko page katoê, kê teharira na merongaku.

¹¹God, siana ko nahuira nga ka meme, hanana siana na kariaku ka bonotenia na hetamaniha iamu tangê. Araha, gu tokorenira renia na raramohamu, ma ku teharira, suria go anumasigami.

¹²Na harata ka pe rongo koro. Ngaira ka hara era ma ka hara roro. Gu katora, ka sutasuta igê na paroparoha iata mareta.

¹³Gu mangariaga tangara ma ku nahuira ngavê, suria ngaira ka guhaguha ma ka hagaparu tare. Igê na tarana ngekê na enoni hato ka page girara, vi igo, God, ko marungia i Isiraele, ma i maveta hagenani nikâ.

¹⁴Na merongaku ka aporo me i manurahi. Ngaira ka hagahoto i hinua raha, manga na totoha ni o, ga ngerengere ma ka angiangi.

¹⁵Ngaira ka mangara na o, ga garigari ngêra. Ngaira ka ngurunguru, manga ga pe masumasu.

¹⁶Inê be kiria na raramohamu raha. I na ara ni mavoraro inê be kiria raha na takuiha iamu, i mareha ge hatohato. Igo ko bani anumasiê tenigi na bagabevoani. Igo ki na ruma nganganihaga, gê rukuruku igê.

¹⁷Igo, God na raramohaku, inê be hagarahasigo, suria igo ki na tahingaku, ma ko takuiê tare ma tarema.