Read Kahua KI 65 Bible Online

KI 65 - Kahua bible

KI 65

¹[៦០] God, i tuguhigami, mi hagarahasigo i Sione ma kami hagamonarigi na suruha iamami tangago,

²suria go aganarigi na nunginungi iata na enoni. Na ara ni enoni hato ka page râ me i pasimu,

³renia ga higera na tasi iata. Na ginomami era ka aharêsigami, ma igo ko bonotenigi.

⁴Ga babarisi na enoni, go atera ma ko unira, ka goga igê na ruma ni rotu iamu. I page togo na aitangihamami renigi na korohamu i pasimu, renigi na mahatanga iamu i Ruma ni Rotu apuna iamu.

⁵Igo ko aganarigami, suria go katogami, kami teha, ma ko hagatahigami renigi na mena, go katogi. Na enoni i maveta hagenani mi na apanini hagatê na asi ngaira ka hagêguri togo renigo.

⁶Igo ko raramohaga hunigo! Igo ko nakagi na barani igê na atohani renia na raramohamu raha.

⁷Igo ko hagapiova na asi, i ramo ma ki arobo, ma ko hagamanapura na enoni, ga katogi na perenga.

⁸Na enoni hato i maveta ka konetenigi bâraha na tagaraha raha iamu. Igê na botoni heri na maveta na enoni hato ka vagevagesigi na tauhamu ma ka ngerengere.

⁹Suria go marupea na mako, igo ko hagarangisia, ma ko katoa, ki korokoro ma ki ango. Igo ko haganongagi na ve, ka gogogo. Igo ko katogi na ngêra ka akê i maveta hagenani surigi na katoha iamu.

¹⁰Igo ko hagarangisigi maninga na mu, ga hikirugi, hanana ga avoka bâkoro. Igo ko hagamarumua na mako, hanana ga vavaka na ngêra.

¹¹Na harisi ni ngêra ki koro teha suria na korohamu. I na ara ni agua ka rakorako igê na ngêra.

¹²Na totoha ni sipi ka rako igê na bena ni go igê na masusu ma igê na tarihani na hungani nikâ.

¹³Na bena ni go ka gahuigi na sipi. Ka rako na ngêra igê na maruguni. Surigi na ara ni hinua hato na enoni ka kiki ma ka ngerengere, suria ga vagevage.