Read Kahua KI 66 Bible Online

KI 66 - Kahua bible

KI 66

¹ Igamu hato na enoni, mu hagarahasia na Araha! Mu ngerengere ma kamu vagevage!

²Mu kiria God, i rongo raha na atana. Mu hagarahasia bâraha.

³Mu vi tanga God, kamu vivi: “Na tauhamu ka koro teha, ma ka hagakonera na enoni. Na raramohamu ki raha teha. Tahema na merongamu ka bêtu tangago ma ka magutenigo.

⁴Na ara ni enoni hato i maveta ka rahesigo. Ngaira ka kiki, ka visigo raha. Ngaira ka ki, ka hagahigasia na atamu.”

⁵Mu râ me, kamu gerigi na marâ, God ki bani tanugi, na tauhana koro, ga hagakonera na enoni.

⁶Ngaia ki katoa, ki mamata na asi. Na uvarika ka tarê igê na ve mamata. I ngekana igia ka vagevage renigi na marâ, i katogi.

⁷Na arahanga iana ki goga tare, suria i raramohaga hunia. Ngaia ki hahutugira na enoni hato, ga pe rahesia. I bara ta na enoni, vige urapusia.

⁸Igamu hato na enoni i maveta hagenani mu kasia akê na God iamami igê na ringemi raha.

⁹Ngaia ki katogami, kami tahitahi, hanana na merongamami ka pe teharigami.

¹⁰God, igo ko bani uhungigami, manga na gi, i hagamatarotaroa na siliva.

¹¹Igo ko nakagami vê, kami tu igê na êtu, ma ko hagamamasiaga apemami.

¹²Igo ko katora na merongamami, ka purigami so nga. Na mamasiaga, ga tarahugami, ka manga na gi ma na maganuha raha. Ma i ngekê igo ko bani merâgami tanga na agua ni tahinga.

¹³Inê be susu tangago i ruma ni rotu iamu. Inê be tagarenigi tangago na marâ, gê bani surugi.

¹⁴Inê be hagamonarigi na suruha iaku, matena ga tarahuê na bagabevoani.

¹⁵Inê be susu tangago igê na bea ni vogasiha renira na sipi, na puruka ma na goti, ma na robona ki page akê i vavearo.

¹⁶Mu karingê, igamu hato na enoni, mu tê viteana na Araha, menê be hagarongogamu renigi na tauhana God tangê.

¹⁷Inê kê avarasia na Araha. Inê kê kiria ma kê visia raha.

¹⁸Manga ve tenia na eraha igê na aitangihaku, na Araha ki asa, vige aganariê.

¹⁹Ma God ki rongoê monari, ma ki aganaria na nunginungi iaku.

²⁰Inê kê hagarahasia God na Araha, suria ngaia ki aganaria na nunginungi iaku, ma ki hagabângenia tangê na takuiha tarema iana.