Read Kahua KI 68 Bible Online

KI 68 - Kahua bible

KI 68

¹[៦២] God ki râ me ki tokorenira na merongana. Na enoni, ga kitenia, ka gavagava tenia, suria i teharira.

²Ngaia ki sikirenira, manga na roga, i rogatenia na robona na gi raha. Manga na girisi i ronu renia na gi ramo, vikê na enoni era ka magahuru vikana nikâ i maana God na Araha.

³Ma na enoni, ga tê viteana, ka obakoro, ma ka vagevage i maana. Ngaira ka obakoro ma ka ngerengere vagevage.

⁴Mu kiria God ma kamu kasia akê. Mu hagatatara na tara tanga God, i goga igê na vaha. Na Araha ka na atana! Mu vagevage i maana!

⁵God ki goga i pasina, na Ruma ni Rotu apuna. Ngaia ki anumasira na gete na nâ ma ki marupera na kare banogo.

⁶Ngaia ki vatera na enoni mahuara na ruma ka goga igê. Ngaia ki torera hura na enoni tenia na ruma ni hagaitangiha, hanana ga apeape tatara, ka nahunia na ramana. Ma na enoni, ga aharêngegi na ramata, ka goga igê na masusu na mako avagavaga.

⁷God, igo ko bêngenira na kariamu, ma ko aharêvoro igê na masusu.

⁸Matena ngekana na ano ki gisigisi, ma ki rangi bâraha tenia na vavearo. Na hungana i Sinai ki gisigisi i maamu, suria go râ me, igo God, ga rahesigo na Isiraelita.

⁹Igo ko katoa, ki rangirangi raha, ma ko hagakoroa aporo na marê aruga iamu.

¹⁰Na kariamu ka nahunia na agua ni suruha. Ma igo ko marupera na enoni matareha renia na korohamu.

¹¹Na Araha ki ngere ki hagagava. Ma rako na gete ka tarohenia, ka vi:

¹²“Ngaira na maneraha ma na me iata ka gava.” Na gete, ga oga i hinua, ka tonganigi na marâ, na mane ka henahuraugi.

¹³Ngaira ka tonganigi na nunuta na kuvê, ga puruigi na apeta renia na siliva ma na gagahata renia na golo. Renia ta na hitangimi ka migioga so na pena ni sipi igê na tangiana ni hearihatana?

¹⁴God raramohaga hunia ki tokorenira na maneraha igê na hungana i Salamone. Ngaia ki katoa na rangi, ki magarisi ngavê, ma ki agorata manga na hê na aisi.

¹⁵Na hungana i Basani ki na apena bagabarana raha teha ma ka rako ngavê igê na botoni.

¹⁶Igo na barana, go nahunigi rako na botoni, renia ta go hengaria na hungana i Sione, God ki atea, vi goga igê? Na Araha ki page goga i ngekana tare, mareha ki hatohato.

¹⁷Na Araha ki râ me tenia i Sinai tanga na agua apuna henigi rako na rehagaro na kati ni hearihatana, suria i bani teha.

¹⁸Ngaia ki tagere igê na hungana i Sione. Ngaia ki merarâ rako na enoni, i henahuraura. Ma na merongana ka mahatangenigi nikâ na votovoto tanga. Na Araha God ki page goga i ngekana.

¹⁹Ka hagarahasia na Araha, i hagamahagia i na ara ni tangiani, suria ngaia ki na God, i hagatahigia.

²⁰God iaka ki na tahingaka. Ngaia ki na Araha, na Araha iaka, i hagatahigia tenia na mera.

²¹I monari, God ki page botagigi na bêta na merongana, na bêta na enoni, ga usi, vige urisi parongata.

²²Na Araha ki bani vi: “Inê kê page henahuraura na merongami. Inê kê page mera aporo tenia na hungana i Basani ma tenigi na matava tara.

²³Vikê igamu kamu page uru igê na gaputa, ma na o iami ka page naminami masu.”

²⁴God, na kariamu hato ka vagevagesia na aporoha me iamu, suria go teha. Ngaira ka vagevagesia na râha me iana God, na maneraha iaku, tanga na ruma ni rotu iana.

²⁵Na enoni, ga kiki, ka nanago, ma na ani ga êhihi, se ga tarugi ta na marâ, ka mumuri. Ma ka rararo na kere gete, ga tahuru kasikasi henigi na ringe.

²⁶“Igamu na kariana God, mu visia raha, matena mu hakuhaku me tanga na hagarahenga. Igamu hato na raraha iana o Jakobo, mu visia raha na Araha.”

²⁷I hagenago me na kere raraha iana o Benamino, ma hemuri ngaira na maneraha ni Juta henira na kareta, ma hemuri tatare na maneraha ni Sibuluni me Napatali.

²⁸God, gu hagabângenia na raramohamu raha, na ramoha, go bani tamanigami renia i nago.

²⁹Gu hagabângenia tenia na Ruma ni Rotu iamu i Jerusaleme, hanana na maneraha ka mahatangenigi igê na votovoto iata tangago.

³⁰Gu ramonia i Esipito na marâ vasiga ngekana, i oga igê na mani asire igê na sugu. Gu ramonira na enoni, ga pe rahesigo, na totoha ni puruka mane ngegana henira na kareta. Gu purira so na enoni, ga vanasigi na haga, ma ku tokorenira na enoni ngegana, ga tenia tare na hearihatana.

³¹Vikê i Esipito ki page mahatangenigi na votovoto tangago, ma i Etiopia ki page rahesigo, Araha.

³²Mu kiria God, igamu hato na maneraha i maveta. Mu kiki kamu visia raha na Araha.

³³Mu hagarahasia God, i oga igê na vavearo, i bani oga me i nago kere vê noga. Mu rongoa, ngaia ki ngerengere igê na ringena, i rongo raha teha.

³⁴Mu tarohenia, vi God ki raramohaga hunia. Ngaia ki marungia i Isiraele ma nikâ na vavearo i ruguhana.

³⁵Na enoni hato ka magu bâraha, matena God i hura me tenia na atohana apuna, na God na Isiraelita ka rahesia. Ngaia ki hagaramonira na kariana ma ki hagagatagatanira. Ka visia raha God na Araha.