Read Kahua KI 69 Bible Online

KI 69 - Kahua bible

KI 69

¹[៦៣] God, gu hagatahiê, gê sugi tono!

²Inê kê kumukumu igê na sugu, i manugunugu ma ki kokoro. Inê kê tarêhia na ve raha, ma na maganuha ki sugi su heniê.

³Inê kê avaravara bâraha, ma ki meme na apeku, ma ki taga na manavaku. Ki hata era na maaku, suria gê bâbâ renigo, vi gu tamaniê.

⁴Na enoni, ga merongasiê purua, ka rako teharigi na varehu i bêku. Na merongaku ka hagatoraiê. Ngaira ka ramo ma ka rapasiê, vigê meme. Ngaira ka tuguriê, kê barugi aporo na marâ, gê pe hanagogi.

⁵God, igo ko bani giraragi na ginoku era, na tauhaku bekabekaga.

⁶Siana kê hagamakira na enoni, ga raruni togo renigo, Araha God raramohaga hunigo. Siana kê hagamakira na enoni, ga rahesigo, igo God, ga hagarapego na Isiraelita.

⁷Renia inê kê tê viteamu, tahema ga guhariê ma ka hagamakiê bâraha.

⁸Inê kê mamahuara tangara na goaku, ma na ahemata iaku ki manga ngekana nikâ.

⁹Na takuiha iaku tanga na Ruma ni Rotu iamu ki manga na gi ramo igê na aitangihaku. Na enoni, ga guharigo igo, ngaira ka guhariê inê.

¹⁰Inê kê angiangi ma kê harihari, ma na enoni ka guhariê.

¹¹Inê kê haga ni asire ma kê angiangi maramara, ma ngaira ka rurusiê.

¹²Na enoni igê na tavani ogaha ka visiê, ma na enoni ni tonoha ka barobaro ki reniê.

¹³Ma tangê inê, inê kê avarasigo, Araha. God, gu aganariê, matena i koro tangago. Gu aganariê renia na takuiha tarema iamu. Gu hagatahiê, suria go hagamonarigi tare na suruha iamu.

¹⁴Gu hagatahiê, suria gê kumukumu kê meme igê na sugusugu. Gu anumasiê tenira na merongaku. Gu hagatahiê tenigi na rutuni.

¹⁵Siana na maganuha ki totora susu heniê. Siana kê tono kê meme igê na rutuni, se vi pinihiê na mako.

¹⁶Gu aganariê, Araha, renia na takuiha tarema iamu ki koro teha. Gu ahariê, suria go takuiê bâraha.

¹⁷Siana ko murisigeê, na kariamu. Inê kê anumanuma. Gu aganariê i ngekê.

¹⁸U râ me ku hagatahiê. Gu hagatahiê tenira na merongaku.

¹⁹Igo ko bani girarara na merongaku hato. Igo ko bani girara, vi ngaira ka guhariê ngavê, ma ka hagamakiê ma ka erasiê bâraha.

²⁰Na guhata iata ka katoê, kê rumakaka. Ma inê kê tako tara. Inê kê vi ma, vi na enoni ka takuiê, ma ki mareha. Inê kê vi ma, vi na enoni ka kanukanuê, ma ki mareha.

²¹Matena gê magê, ngaira ka kuasiê igê na ngêra. Matena gê pasi tono, ngaira ka vateê na ve mahe.

²²Go katogi na magotoha iata, ka voravora na tu tangara, ma na vogasiha iata ka voravora na suta tangara. Gu kuasira igê na ngêra iata.

²³Gu hagagurura ma ku hagamarusiga apeta.

²⁴Gu mangariaga tangara, ma ku hagaitangira bâraha.

²⁵Gu hagasuhigi na hinua iata ma ku hagabarugigi, ma ka mutemute surigi na ruma iata.

²⁶Renia ngaira ka merongasira na ani go bani hagaitangira, ma ka hagamamarira nikâ na ani, go bani hagamamarira.

²⁷Gu hagaitangira nga renigi na ara ni tasi hato iata. Siana ko takuira, ma siana ko tako purua ma vê renira.

²⁸Gu ahunigi na atata tenia na buka ga goga igê na enoni, ga mauri. Siana ko tomanira henira na kariamu, ga tê viteamu.

²⁹Inê ki hahara na apeku ma kê tako tatara. God, gu hagaramoniê ma ku hagatahiê.

³⁰Inê be ki be visia raha God na Araha. Inê be hagarahasia ma be visia koro.

³¹Na tarana ngekê ki hagakoro obana na Araha, teharigi na vogasiha renira na puruka, mane se hehene, raha ma bâkoro era.

³²Ma ka page vagevage na enoni, ga hatamigi na mamasiaganiha, matena ga bâsigi na tarani ngegê. Ma na enoni, ga tê viteana God na Araha, ka page ramoramo aporo.

³³Na Araha ki aganarira na enoni matareha, ma ki takusira tare na kariana, ga oga i ruma ni hagaitangiha.

³⁴Visia raha God, igamu na vavearo, na ano ma na asi ma na marâ hato, ga oga igê.

³⁵Renia God ki page hagatahia Sione, ma ki page tagarahigi aporo na hinua raha i Juta. Na kariana ka page oga i ngekana, ma ka page nahunigi na mako.

³⁶Na kareta na kariana ka page nahunigi urusira. Ma na enoni, ga takuia God, ka page oga i ngekana.