Read Kahua KI 7 Bible Online

KI 7 - Kahua bible

KI 7

¹[៥] Araha, God iaku, inê kê gava vê i pasimu, hanana go anumasiê. Gu hagatahiê tenira na enoni, ga tavogeniê. Gu marungiê tenira na merongaku.

²Ngaira ka mangara na o vasiga. I era ma, ka oke babaheniê. Ngaira ka nanê, viga ngasiê. Ma ti ki page hagatahiê?

³Araha, God iaku, manga inê ma be erasia ta na enoni.

⁴Manga inê, ma be barua na korohana na tamaku renia na eraha. Manga inê, ma be hanago tenia na merongaku, ma be tasi renia.

⁵Vikana ke koro ma, vi na merongaku ke tavogeniê, ma ke hagatotongoê ma ke tauê. Vikana ke koro ma, vige puriê rârâ, be me i ano, ma ke paniê so i ano.

⁶Araha, u râ me igê na mangariaganiha iamu. Gu urapusira na merongaku, ga mangariaga ngavê. God iaku, gu tamaniê. Gu hagakotira, hanana i voravora me na otoha.

⁷Gu hagahakura rihigo na enoni hato i maveta, ma ku marungira tenia na atohamu i haha.

⁸Araha, gu surira na enoni hato i maveta. Gu suriê koro inê. Suria go bani girara, vi inê kê pe aharê rârâ.

⁹God, igo ko koro ma oto. Igo ko surigi na takotako ma na obaniha iamami. Gu hagabungira na enoni era, ma ku hagaramonira na enoni koro.

¹⁰God ki anumasiê tare, ma ki hagatahira na enoni, ga tê viteana.

¹¹Na suriha iana God ka koro ma oto tare. Ngaia ki hagaitangira tare na enoni era.

¹²Manga ngaira, ma ka pe urusi parongata, God ki page ratea na tatapa raha iana. Ngaia ki bani rohea na epage iana.

¹³Ngaia ki tangaru, ma ki nanê ni henahu. Ngaia ki okegi na mage giga ma ki usira na enoni era.

¹⁴Bâsira na enoni tasi. Ngaira ka takusigi ma na eraha. Ngaira ka heboroge i obata na eratani, ma ka hagavoregi na hagaparunga.

¹⁵Ngaira ka sutasuta karira na enoni getera, ma ngaira mareta ka votavota igê.

¹⁶Na eraha iata ka apariri bê aporo tangara mareta. Na mamasiaganiha, ga katogi tangara na enoni getera, ka apariri bê aporo tangara mareta.

¹⁷Inê be visia koro na Araha renia na otohana. Inê be visia raha na Araha, i teha, renigi na ki iaku.