Read Kahua KI 71 Bible Online

KI 71 - Kahua bible

KI 71

¹Araha, inê kê gava i pasimu, ko anumasiê, hanana siana kê maki.

²Gu tamaniê ma ku hagatahiê. Gu aganariê ma ku ura pusiê, suria ga oto tare na tauhamu.

³Igo ki na tahingaku koro. Gu anumasiê manga na ruma nganganihaga, suria igo ki na tahingaku ma ko ura pusiê.

⁴God, gu hagatahiê tenira na enoni era, tenira na enoni, ga aharêngegi na ramata, ma ka katogi na mamasiaganiha.

⁵Inê kê hagêguri togo renigo, Araha. Inê kê bani raroni togo renigo, haganega me tenia gê sisite.

⁶Inê kê bani hagêguri togo suria na maurihaku hagenani. Igo ko bani marupeê, haganega me matena gê vora me. Inê be visigo raha tare.

⁷Na mêrihaku ki na hagararinga koro tangara rako na enoni, suria igo ko ama ni anumasiê nga.

⁸Inê kê visigo raha na ara ni tangiani, ma kê hagarahasigo tare.

⁹Siana ko kasi reniê, matena i ngekê gê vora na bani nuni. Siana ko paniê, matena i ngekê gê pe ramo.

¹⁰Na merongaku ka teniê, viga nahuiê kê meme. Ngaira ka haku, ka harikato reniê.

¹¹Ngaira ka vi: “God ki bani kasi renia. Ge tarigenia ke têa. I asa ta na enoni, vige hagatahia.”

¹²God, siana ko hagarisiê. Gu rêrête me, ku tamaniê, God iaku!

¹³Gu teharira ma ku erasira ngavê na enoni, ga torahuriê. Gu hagamakira ma ku hagaruruhi apeta na enoni, ga rapasiê.

¹⁴Inê be ama ni hagêguri togo nga renigo. Inê be hagarahasigo bâraha tare.

¹⁵Inê be tarohenigi tare na korohamu ma na tarani ni tahinga iamu, naka ma gê pe giraragi bâkoro.

¹⁶Araha God, inê be tarohenigo, vi go raramohaga hunigo, ma ko oto ma koro, igo getego.

¹⁷Igo ko bani hagesuriê, haganega me tenia gê sisite, ma kê tarohenigi mênga na mena iamu.

¹⁸God, siana ko paniê i ngekê, matena gê vora na bani nuni ma kê gohogohoraga. Gu oga heniê, matena gê tarohenigi na raramohamu raha tangara na ara ni raraha hato i muri me.

¹⁹God, na raramohana na otohamu ki raha teharia na vavearo. Na tagaraha iamu ka bagaraha teha. Ti ki maratoramu?

²⁰Igo ko bani hagamamasiagê ma ko haganumanumaê. Ma igo ko page hagaramoniê aporo, ma ko page anumasiê tenia na matahu.

²¹Igo ko page haganaku parongaku, ma ko page hagarahasiê nga.

²²Inê be visigo raha, God, igê na gita iaku. Inê be hagarahasigo, renia go hagamonarigi tare na tamasinga iamu. Inê be kirigo igê na gita iaku, God, na Isiraelita ka rahesigo.

²³Inê be ngere vagevage, matena gê kirigo. Inê be kirigo igê na mêrihaku hagenani, suria go hagatahiê.

²⁴Inê be tarohenigi tare na korohamu ma na otohamu, suria go hagamakira ma ko hagaruruhi apeta na enoni, ga rapasiê.