Read Kahua KI 72 Bible Online

KI 72 - Kahua bible

KI 72

¹[៦៥] God, gu hagaotoa na maneraha, hanana i surira oto na enoni tagenana manga igo. Gu katoa, ke surira na enoni suria na otohamu maremu.

²Vikê ngaia ki page marungira na kariamu igê na otoha, ma ki page bâbâsurira oto maninga na enoni, ga hatamigi na mamasiaganiha.

³Gu katoa na ramana tangara na enoni hato i na agua hagenani.

⁴Gu katoa na maneraha, ke surira oto na enoni matareha, ma ke tamanira na enoni, ga baguru, ma ke teharira na ani ga hagamamasiagara.

⁵Vikê na kariamu ka rahesigo, ki bê ki arâ, mataro me karu meme na arito ma na hageha.

⁶Gu katoa na maneraha ke manga na rangi, i rangisigi na mu ma na mako.

⁷Gu hagaraha na otoha suria na mêrihana hagenani, ma ku hagaraha na ramana, mataro me ki meme na hageha.

⁸Na arahanga iana ki page marungia na maveta hagenani tenia tapanena tanga tapanena.

⁹Na enoni igê na masusu ka page hagahigasia, ma na merongana ka page bêtu so i ano.

¹⁰Na maneraha ni Taresi ma igê na marê ka page mahata tanga. Ma na maneraha ni Saba mi Seba ka page vutungia.

¹¹Na ara ni maneraha hato ka page bêrusu tanga. Na enoni hato i maveta ka page tagara tanga.

¹²Ngaia ki hagatahira na enoni matareha, ga avarasia. Ngaia ki tamanira na enoni, ga baguru, ma ka pe tarahua na hetamaniha igê na mamasiaganiha iata.

¹³Ngaia ki takuira na enoni, ga makumakusiga, ma ki hagatahira na enoni matareha ma na ani ga baguru.

¹⁴Ngaia ki hagatahira tenira na ani ga hagamamasiagara, suria na mêrihata ka na marâ manimani tanga.

¹⁵Ge mauri arihu na maneraha! Ke rakorako i pasina na golo ni Seba. Ge nungia God tare nga, hanana i korokoro tare tanga.

¹⁶Ke rakorako bâraha na ngêra igê na agua. Na mu ke gahuigi na hungani, ke ganora mangagi na hungani i Libanone. Na hinua raha ke vunu renira na enoni, ke rako mangagi na go igê na masusu.

¹⁷Na enoni ke takusia tare na maneraha. Ke rongo raha tare na atana, mataro me ki meme na arito. Na enoni hato i maveta ke nungia na Araha, ki korokoro tangara, tagenana manga ngaia i korokoro tanga na maneraha.

¹⁸Visia raha na Araha, na God, ga rahesia na Isiraelita, suria ngaia getea ma ki tanugi na mena.

¹⁹Hagarahasia tare na atana, i rongo raha. Ke raharaha nga na bâbâhana raha i maveta hagenani. Monari! Monari!

²⁰Ikê ki na hatungini na nunginungi, i visigi o Tavite, o karena o Jese.