Read Kahua KI 73 Bible Online

KI 73 - Kahua bible

KI 73

¹[៦៦] I monari, God ki koro tangara na kariana, tangara na ani ga matarotaro maninga i maana.

²Ma tangê inê, inê kê sugi tapasu, ma kê sugi atobera.

³Renia inê kê hengarira na ani ga paroparo, matena gê bâsigi, ga tavoraha maninga na marâ tangara na enoni, ga erataga.

⁴Ngaira ka pe hatamigi na mamasiaganiha. Ngaira ka apekoro ma ka bâ raramohaga.

⁵Ngaira ka pe anumanuma mangara na enoni getera. Ga pe tarahura na bagabevoani mangara na enoni getera.

⁶Ngaira ka mahe renia na paroha, manga vi ngaia ki na rêni iata. Ngaira ka hagamamasiagara na enoni. Na tarana ngekê ki manga na tuguni iata.

⁷Na eraha ka huhura me tenigi na obata, ma na katoha era ka huhura me tenigi na aitangihata.

⁸Ngaira ka rurusira na enoni getera, ma ka tamasi era. Ngaira ka paroparo ma ka katokato, hanana viga hagamamasiaga apeta na enoni getera.

⁹Ngaira ka tamasi erasia God na Araha, ma ka rahasira ma ka hagamakukura na enoni.

¹⁰Vikê tani na kariana God ka aharo surira, ma ka magesigi na tamasinga iata.

¹¹Ngaira ka vi: “God ki hite. Na Araha raha teha ki bono na bêna.”

¹²Na enoni era ka manga ngegana. Ngaira ka pe gagêmaga renia ta na marâ, ma ka ama ni ruruguha nga tare.

¹³Manga gê matarotaro, ki hega? Gê pe nahunia vari ta na marâ? Manga gê pe tasitasi, ki hega? Gê pe nahunia vari ta na marâ?

¹⁴God, inê kê hatamigi na mamasiaga i na ara ni tangiani. I na ara ni mavoraro ka tarahuê na hagaitangiha.

¹⁵God, manga inê, ma be tamasi mangara ngaira, inê ki asa, ve kato, manga vi inê ta na kariamu.

¹⁶Inê kê uhungia, vi ve aramia na hagatenga iaku, ma ki bara ngavê tangê.

¹⁷Vikê inê kê banu i Ruma ni Rotu iamu, ma kê kahu girara na ta ki page tarahura na enoni era.

¹⁸God, igo ko page katora, ka arâ igê na tara, ga matari, ma ko hagavotarira, ka meme.

¹⁹Ngaira ka gasuga ni me hagetage. Na hatongina tangara ki era ngavê.

²⁰Ngaira ka manga na maruteha, i magahuru râ, matena ga riterite. Matena go aharaga, Araha, ngaira ka magahuru hagetage.

²¹Matena i era na obaku ma ki hata era,

²²inê kê hite manga na bo. Inê kê pe hagarego.

²³Naka ma i manga ngekana, ma inê kê pe panigo, ma igo ko uruê.

²⁴Igo ko hagaotoê renia na hagesuringa iamu. Ma i hemuri me igo ko page uniê banu i pasimu, ma ko page hagarahasiê.

²⁵Na ta kê obania nikâ i pasimu? Igo ma God. Na ta kê obania nikâ i maveta? Igo getego ma Araha.

²⁶Vari inê kê page pe takotako maninga, ma ki pe ramoramo na apeku. Ma God nga ki hagaramoniê. Ngaia getea ma kê obania.

²⁷Na enoni, ga panigo, ka page meme nga. Igo ko page erasira ngavê na enoni, ga pe tê viteamu.

²⁸Ma tangê inê, ki koro era tangê, inê kê pe arisigo. Araha God, inê kê rukuruku i pasimu, hanana go anumasiê, ma inê be tarohenigi na korohamu hato tangê.