Read Kahua KI 74 Bible Online

KI 74 - Kahua bible

KI 74

¹[៦៧] God, tanu hega ko kasi renigami tare? Igo ko mangariaga tare vari tangara na kariamu?

²Gu takusira na kariamu, go bani atera me i nago kere vê noga. Igo ko bani torera hura tenia na agua ni mamasiaganiha, hanana ga voravora mangara na raraha iamu. Gu takusia na hungana i Sione, ma na agua, go bani oga igê i nago.

³Gu râ ku bâsigi na ruma, ga tâ i ano hagetage. Na merongamami ka bani hagaerasigi ngavê na ara ni marâ hato i Ruma ni Rotu.

⁴Na merongamu ka ngerengere i Ruma ni Rotu iamu, suria ga teharira na kariamu. I ngekana ngaira ka hagêrasigi na girarani, vi ngaira ka teha.

⁵Ngaira ka katokato mangara na mane ni tapiha, ga tapigi na apinige renigi na akesi.

⁶Ngaira ka tahe kumukumugigi na bari renigi na akesi ma na tahuru iata.

⁷Ngaira ka kumukumugia na Ruma ni Rotu iamu, ma ka sungia ma ka tê erasia na agua apuna, na enoni ga rahesigo igê.

⁸Ngaira ka obania, viga hatungigami hagetage. Ngaira ka sungigi na ara ni agua ni vogasiha igê na agua hagenani.

⁹Na marâ apuna hato ni rotu iamami ka bani nahuraugi. Ka mareha ngavê na poropete i pasimami. I arihu manga i he, ka page gâga surigi na tarani ngegê? Mareha ta na hitangimami, vige girara.

¹⁰God, i arihu manga i he, ka rurusigo na merongamu? Ngaira ka page tamasi erasigo tare vari?

¹¹Renia ta ko pe tamanigami? Renia ta ko pe gagêmaga renigami?

¹²God, igo ko bani Araha iamami, haganega me tenia i nago kere vê noga, ma ko bani hagatahigami me noga hagarako.

¹³Renia na raramohamu raha igo ko voasia na asi, ma ko menamenarigi na bêta na hua raha.

¹⁴Igo ko rumurumugia na bêna Leviatane, na ega raha, ma ko hagangêra na pageva renia na apena.

¹⁵Igo ko katogi, ka gogogo na ve banga ma na ve sisite, ma ko hagamamatagi na ve raha.

¹⁶Na tangiani ma na bungiani ka na animu. Igo ko nakagi na arito, ma na hageha ma na higu igê na atohani.

¹⁷Igo ko nakagi na akerena ma na bogona na maveta, ma ko hagavoragi na mateni na parenga ma na rogaroga ahuru.

¹⁸Araha, siana ko bonotenia, vi na merongamu ka rurusigo, ma ka ruhigo ma ka pe tê viteamu.

¹⁹Siana ko panira na kariamu makumakusiga tangara na merongata, ga hagamamasiagara. Siana ko naka ma vê na kuvê iamu tanga na tehe. Gu takusira na kariamu, ga oga igê na mamasiaganiha.

²⁰Gu takusia na suruheri, go bani naka henigami. Na mamasiaganiha ki râhia na agua hagenani.

²¹Siana ka maki na enoni, ga oga igê na mamasiaganiha. Gu katora, ke hagarahasigo aporo na enoni, ga matareha ma ka baguru.

²²God, gu gagêmaga ma ku suraga. Bâ, na enoni, ga pe tê viteamu, ka rurusigo tare i na ara ni tangiani.

²³Bâsira na merongamu ka hagaramo. Ngaira ka puhara ma ka ngerengere tare.