Read Kahua KI 77 Bible Online

KI 77 - Kahua bible

KI 77

¹[៧០] Inê kê avarasia raha God na Araha. Inê kê ngere raha, hanana i aganariê.

²I na matena na bagabevoani inê kê takusia na Araha. Surigi na bungiani nikâ inê kê nunginungi, ma kê ama ni hata era nga.

³Inê kê takusia God ma kê gegege. Matena gê takotako renia, inê kê bagahagêguri.

⁴Ngaia ki katoê, kê pe mauru surigi na bungiani. Inê kê anumanuma bâraha, ma ki asa be tamasi.

⁵Inê kê takusigi aporo na mateni i nago. Inê kê takusigi aporo na harisi hato vê kere vê noga, matena gê kirigi na tagaraha raha iana.

⁶I na ara ni bungiani inê kê pe mauru, suria gê takotako bâraha renigi na hagatenga iaku mareku.

⁷Na Araha ki page kasikasi renigia vari? I asa vari, vige korokoro tangagia nikâ?

⁸Ngaia ki hato vari, vige takuigia? Na suruha iana ka hato vari?

⁹I hatohato vari na takuiha tarema iana? Na mangariaganiha ki bani urusia vari na takuiha iana?

¹⁰Vikê inê kê vi: “Na marâ, gê hata era bâraha renia, ikê: God na Araha ki asa, vige raramohaga nikâ.”

¹¹Inê be takusigi aporo na tagaraha raha iamu, Araha. Inê be takusigi aporo na mena iamu i nago.

¹²Inê be takotako renigi na ara ni marâ hato, go bani tanugi, renigi na tagaraha raha iamu, ga hagabângenia na raramohamu raha.

¹³Na tauhamu, God, ka matarotaro teha. O ti ki maratoramu?

¹⁴Igo nga ki na God, go tanugi na mena. Igo ko hagabângenia na raramohamu raha i pasita na enoni i maveta, ga pe tongesurigo.

¹⁵Renia na raramohamu igo ko hagatahira na kariamu, na raraha iaterua o Jakobo mo Josepo.

¹⁶Matena na ve ma na asi ka bâsigo, Araha, ngaigi ka magu, ma na rutuni ka gisigisi.

¹⁷Na roto ka rangirangi. Na akurua i vavearo, ma na marangea ka sisiki.

¹⁸Na akurua ka gugusuhia. Na marangea ka takiria na maveta, ma na ano ki gisigisi ma ki angingi.

¹⁹Igo ko râ mamata i gupuna na asi. Na tara iamu ki râ igê na rutuni. Ma ki asa, ka bâsigi na peregamu.

²⁰Igo ko bêngenira na kariamu, manga na avanu ni sipi, matena o Moise mo Aroni karu bâsurira.