Read Kahua KI 78 Bible Online

KI 78 - Kahua bible

KI 78

¹[៧១] Kariaku, mu karinga na hagesuringa iaku, ma kamu rongogi na marâ, ve visigi.

²Inê be tamasi maramaraveta, ma be ramatenigi na sihonga i nago.

³Inê kê tamasigi na marâ, igia ka bani rongogi ma ka bani giraragi: na marâ, ga hagatarêngenigi tangagia.

⁴Ki tuguhigia, viga hagatarêngenigi nogaka na sihonga renia na raramohana na Araha. Ki tuguhigia, ga hagarongora na kareka renigi na tagaraha raha ma na mena iana.

⁵Ngaia ki naka na suruheri iana henira na Isiraelita. Ngaia ki vatera na raraha iana o Jakobo na ramata iana. Ngaia ki bonasira na uvarika, hanana ga hagesurira na kareta renigi na ramata iana,

⁶hanana ga hagatarêngenigi nogata.

⁷Igê na tarana ngekê ngaira nogata ka page hagêguria na Araha, ma ka pe bonotenigi na tagaraha raha iana, ma ka marupegi tare na ramata iana.

⁸Vikê ngaira ki asa, vige mangara na uvarita, ga guguruga bâraha ma ka haritohe. Ngaira ka pe tari suria tare na Araha, ma ka pe toto suria tare igê na ogaha iata.

⁹Na raraha iana o Eperemo ka aresurira na mage ma na epage. Ngaira ka migigava igê na tangiana tanga na hearihatana.

¹⁰Ngaira ka pe marupea na suruheri, God ki bani naka henira. Ngaira ka usi, vige râ surigi na ramata iana.

¹¹Ngaira ka pe takusigi na tagaraha iana, ma ka bonotenigi na mena, ga bâsia, i tanugi.

¹²I maata na uvarita God ki tanugi na mena igê na masusu i Soane i Esipito.

¹³Ngaia ki voasia na asi, ki ura i na apanena heri, ma ki merarâ igê.

¹⁴Surigi na tangiani ngaia ki bêngenira renia na vaha, ma surigi na bungiani renia na gi mave.

¹⁵Igê na bagamasusu raha ngaia ki tahurugi na hê raha, ma ka bangobango me igê na ve, i hagatonomira renigi.

¹⁶Ngaia ki katogi na ve, ka pusupusu me tenigi na hê ngegana, ma ka vora me na ve oto.

¹⁷Ngaira ka ama ni guguruga nga tanga God na Araha. Ngaira ka ama ni tasitasi nga, matena ga oga igê na bagamanihê raha.

¹⁸Ngaira ka uhungia God na Araha, suria ga tuguria, vi vatera na ngêra, ga obanigi.

¹⁹Ngaira ka heriga God, ka vivi: “God ki pe girara vari, vi vategia na ngêra igê na bagamanihê raha.

²⁰I monari, ngaia ki tahurua na hê raha, ma na ve ka pusupusu me igê. Ma ngaia ki girara vari nikâ, i hagangêra na kariana renigi na bereti ma na ganiani?”

²¹Tahema na Araha ki mangariaga tangara, suria ga tamasi heriga. I ama ni raharaha nga na mangariaganiha iana. Ngaia ki manga na gi, i hagaitangira na kariana.

²²Renia ngaira ka pe hagêguri togo renia. Ma ngaira ka pe tongesuria, vi ngaia ki page hagatahira.

²³Ma ngaia ki bonasia na vavearo, ki tahataha,

²⁴ma tenia i pasina ngaia ki karangigi na bereti, na mana, i vatera, ka ngêgi.

²⁵Vikê ngaira ka ngêa na ngêra iata na angero. Ma God ki vatera, ka ngê masu tare.

²⁶Renia na raramohana ngaia ki katogi na roga, i rogaroga, tani i kerekê, ma tani ki na toragina.

²⁷Tangara na kariana ngaia ki hagatorangenira vota na manu, ga rako mangagi na one i one.

²⁸Ngaira ka vota so i hinua, i berarogani na ruhu iata.

²⁹Vikê na enoni ka ngê masu renigi. God ki vatera na ngêra, ga turigi.

³⁰Matena ngaira ka ngêngê mênga ma ka mamênga, vige masumasu, God ki hata ni mangariaga tangara.

³¹Ngaia ki nahuira ka me na mane ramo iata, na mane haoru ramo, ga maongo ma ka ngêngê papasi.

³²Nakagi ma na tarani ngegê, ma ngaira ka ama ni tasitasi nga. Naka ma God ki katogi na mena, ma ngaira ka pe tongesuria.

³³Ngaia ki hagabubugi na mêriha iata, manga na kere manavasua, ma na mêrihata ka hata ni era ngavê.

³⁴Na ara ni mateni God ki nahuira tani ka meme, ngaira ka takusia aporo God, ka urisi parongata ma ka rahesia maninga.

³⁵Ngaira ka takusia aporo God raramohaga hunia, vi anumasira ma ki hagatahira.

³⁶Ngaira ka sukasuka ma, ma ka hagaparu. Ngaira ka nakanaka bêta tanga.

³⁷Ngaira ka pe toto suria. Ngaira ka pe hagamonaria na suruheri, i bani naka henira.

³⁸Ma God ki takuira na kariana. Ngaia ki bonotenigi na tasi iata, ma ki pe nahuira ke meme. Hagarako ngaia ki naka vê ma na mangariaganiha iana, ma ki pe mangariaga bâraha tangara.

³⁹Ngaia ki bani girara, vi ngaira ka na enoni makumakusiga, manga na roga i riri tare.

⁴⁰Hagarako era ngaira ka guguruga tanga na Araha, ma ka hagabono obana igê na bagamanihê raha.

⁴¹Ngaira ka uhungia God hagarako tare, ma ka urapusia na Araha, ga rahesia na Isiraelita.

⁴²Ngaira ka pe takusigi na raramohana raha, matena i hagatahira tenira na merongata.

⁴³Ngaira ka pe takusigi na tagaraha raha ma na mena, i katogi igê na masusu i Soane i Esipito.

⁴⁴Ngaia ki katogi na ve, ki vora re na gapu. Ma na ai ni Esipito ki marehasira na ve ni tonoha.

⁴⁵Ngaia ki kasira me rako era na rango ru, ka hagamamasiaga apeta, ma rako na êrê nikâ ka erasira.

⁴⁶Ngaia ki kasira me na oru ka ngêgi na ngêra iata, ma nikâ na pê, ka ngêgi na mu iata.

⁴⁷Ngaia ki hagamêgugi na varo ni vaini ma ki hagamariagi na apinige na fiki renirerua na rangi ma na roga, ga magarisi ngavê.

⁴⁸Ngaia ki hagamesira na puruka ma na sipi renigi na maeha, ga tatarê.

⁴⁹Ngaia ki mangariaga ngavê tangara, ma na mangariaganiha iana ki hagamamasiaga apeta bâraha. Ngaia ki hagatorangenira na angero iana, hanana ga hagamesira.

⁵⁰Ngaia ki mangariaga ngavê nga tangara ma ki hagamesira renia na ringa.

⁵¹Ngaia ki hagamesira na bêbê ni kare igê na ara ni ahemata iata na ai ni Esipito.

⁵²Me muri ngaia ki bêngenira hura na kariana, manga na avanu ni sipi, ma ki hagaotora igê na bagamanihê raha.

⁵³Ngaia ki bêngenira ka ape tatara ma ka pe magu, ma na asi ki marupi hurira na merongata.

⁵⁴Ngaia ki merarâ tanga na agua ni suruha iana, tangagi na hungani, i bani parênigi.

⁵⁵Ngaia ki tarira hurira na enoni, ga oga i ngekana, ma na kariana ka urusira. Ngaia ki votoa na mako tangara na raraha iana o Isiraele. Ma ngaira ka nahunigi na hinua iata, ka oga igê.

⁵⁶Ngaira ka guguruga tanga God raramohaga hunia. Ngaira ka uhungia, ma ka aharêngigi na ramata iana.

⁵⁷Ngaira ka murisigea ma ka pe toto suria, mangara na uvarita, ga pe tari suria nogata. Ngaira ka hagahagabeka, manga na mage, i gogo ahiohio.

⁵⁸Ngaira ka hagamangaria ma ka katoa ki hengari, suria ga vogasira na ataro, ga tahe nununi.

⁵⁹God ki mangariaga, matena i rigia na tarana ngekana. Tahema ngaia ki kasi renira ngavê na kariana.

⁶⁰Ngaia ki pania na agua i Silo, ga vogasia igê, na hinua i oga berarogaka.

⁶¹Ngaia ki hagamarumungenira na merongata, ka henahuraua na bokesi na suruheri, na girarana na raramohana ma na bâbâhana raha.

⁶²Ngaia ki mangariaga tangara na kariana. Tahema na merongata ka nahuira ngavê.

⁶³Na mane haoru ka me igê na hearihatana, ma na gete haoru ka mareha na mane tangara, viga êragira.

⁶⁴Na mane ni hagarahenga ka me igê na henahunahu. Ma na gete iata, ga nâ, ki apu, vige angi maramara renira.

⁶⁵Me muri na Araha ki aharaga manga na mane i rite. Ngaia ki manga na mane ramo, i ngere, suria i tono na vaini.

⁶⁶Ngaia ki teharira na merongana, ka gava ma ka maki teha tare.

⁶⁷Ma ngaia ki usitenira na raraha iana o Josepo, ma ki pe atera na raraha iana o Eperemo.

⁶⁸Ngaia ki atera hete na raraha iana o Juta ma na hungana i Sione, na hungana i takuia bâraha.

⁶⁹I ngekana ngaia ki torea igê na Ruma ni Rotu iana, i akê ngavê kerekê noga, ma ki nganganihaga tare manga na maveta.

⁷⁰Ngaia ki atea o Tavite na kariana. Ngaia ki tavoa hura tenigi na pariki,

⁷¹suria ngaia ki bâsuri sipi. Ngaia ki kasia ki maneraha iata na Isiraelita, hanana i bâbâsurira na kariana God na Araha.

⁷²O Tavite ki marupera ma ki takusira na enoni, ma ki hagaotora bâkoro era.