Read Kahua KI 80 Bible Online

KI 80 - Kahua bible

KI 80

¹[៧៣] Araha, igo ko marupera na Isiraelita. Gu aganarigami ma ku bêngenigami manga na sipi iamu. Igo ko oga so igê na atohamu raha, i avorata na marâ, ga tonga na gagahata.

²Gu tamanira na raraha iata o Eperemo mo Benamino mo Manase. Gu hagabângenia na raramohamu raha ma ku râ me ku hagatahigami.

³God, gu hagaporosigami! Gu takuigami, hanana mi tahitahi!

⁴God Araha raramohaga hunigo, i arihu manga i he, ko mangariaga tangara na kariamu ma ko pe aganarigi na avarasiha iata?

⁵Igo ko hagangêgami renigi na ngêra ni mamasiaganiha, ma ko hagatonomigami renigi na tavoni na mamami.

⁶Igo Ko hagamarumungenira na enoni ahuroto i na agua rihigami, ka heariha renia na apanena iamami, ma na merongamami ka tamasi erasigami.

⁷God raramohaga hunigo, gu hagaporosigami! Gu takuigami, hanana mi tahitahi!

⁸Igo ko bani mehura na varo na vaini tenia Esipito. Igo ko kasira hura tenia na apanena iata na enoni ahuroto, ma ko hasia na varo na vaini igê.

⁹Igo ko manigaia na agua tanga, i akê igê. Na vagani ka so ngavê, ma ngaia ki rubuhia na agua hagenani.

¹⁰Ngaia ki rubuhigi na hungani ma ki mamarusigi. Na arani ka mamarusigi na nuri raha.

¹¹Ka arubebe na arani ka tariha i asi, ma kere banu ngavê tanga na ve i Uparatesi.

¹²Renia ta ko hogegi na para, ga rihia? Tahema na enoni, ga riri i ngekana, ka hanagogi na guani na vaini.

¹³Na bo vasiga ka suea na mu ni vaini, ma na marâ vasiga i bemu ka ngaua.

¹⁴God raramohaga hunigo, gu aharigami. Gu gagêmaga renigami tenia na atohamu. Gu marupea na varo na vaini ngekê. Gu hagatahigami na kariamu.

¹⁵Gu hagamauria aporo na varo na vaini, go bani hasia ma ko bani marupea, ki mauri koro.

¹⁶Na merongamami ka bani tapia so ma ka sungia. Gu mangariaga tangara, ku erasira ngavê.

¹⁷Gu marupera ma ku anumasira na kariamu. Igo ko bani atera ma ko bani hagarakonira, ka ura gatagata.

¹⁸I asa iamami, vigami page murisigego nikâ. Gu hagamaurigami, ma igami kami page hagarahasigo.

¹⁹God Araha raramohaga hunigo, gu hagaporosigami! Gu takuigami, hanana mi tahitahi!