Read Kahua KI 84 Bible Online

KI 84 - Kahua bible

KI 84

¹[៧៧] God Araha raramohaga hunigo, na Ruma ni Rotu iamu ki bâ hagavagevage tangê.

²E, ê obania bâraha be goga i ngekana; ê barigia be oga i Ruma ni Rotu iana na Araha. I mêrihaku hagenani inê kê vagevagesia na Araha, i votoa na morana na mauriha.

³Na gapagapêsu nikâ ka bani tagarahigi na robota igê ma na ririgape nogata. Na kareta ka oga igê na robota hagarangia na bea ni vogasiha. God raramohaga hunigo, igo ki na Araha iaku ma na God iaku.

⁴Ga babarisi na enoni, ga oga i Ruma ni Rotu iamu. Ngaira ka kirigo ma ka hagarahasigo tare.

⁵Ga babarisi na enoni, ga rukuruku i pasimu, hanana go anumasira. Ga babarisi na enoni, ga agana ga tavoraha i Sione, hanana ga rahesigo i ngekana.

⁶Matena ga aharêvoro igê na maroguna i Baka, na Araha ki katogi ka vora me na ve karu i na agua na ve ka mareha rârâ igê.

⁷Matena ga arâ i tara, ngaira ka ama ni ape mamêriga nga. Ngaira ka page ata i Sione i maamu, God raha teha, go teharira na ataro.

⁸God raramohaga hunigo, gu aganarigi na nunginungi iaku. Gu karingê, God, o Jakobo ki rahesigo.

⁹God, gu korokoro tanga na ani, i anumasigami. Gu takuia na ani, go bani monea, ki maneraha.

¹⁰Na tangiana gi tage i rarona na Ruma ni Rotu iamu ki koro ngavê teharigi na rehagaro na tangiani i tagua. Inê kê ura hete i metara i maani ruma iana God iaku teharia gê oga i pasita na enoni era.

¹¹Na Araha ki bêngenigia manga na arito. Ngaia ki anumasigia manga na bêata, ki mahata tangagia ma ki kasigia akê. Na Araha ki pe marakorotenigi na ani ma na marâ koro tangara na enoni, ga koro ma ka oto i maana.

¹²God raramohaga hunigo, ga babarisi na enoni, ga hagêguri togo renigo.