Read Kahua KI 86 Bible Online

KI 86 - Kahua bible

KI 86

¹[៧៩] Araha, gu karingê ma ku aganariê, suria inê kê makumakusiga. Ma inê kê pe tarahua na hetamaniha igê na mamasiaganiha iaku.

²Gu hagatahiê tenia na mera, suria inê kê toto surigo Gu hagatahiê, suria inê ki na kariamu ma kê hagêguri togo renigo.

³Gu takuiê, suria igo ki na God iaku. Inê kê avarasigo i na ara ni tangiani.

⁴Araha, gu hagakoro obaku, na kariamu, suria gê rahesigo tare.

⁵Igo ko korokoro tangagami ma ko bonotenigi na tasi iamami. Igo ko takuira tare na enoni, ga rahesigo.

⁶Araha, gu aganaria na nunginungi iaku. Gu tamaniê, suria gê avarasigo.

⁷Inê kê avarasigo igê na mateni na bagabevoani, suria igo ko aganarigi na nunginungi iaku.

⁸Araha God, i pe goga na ani, vige maratoramu, ma ka pe oga na tagaraha raha, vige maratorani na animu.

⁹Na enoni hatohato, go bani hagavorara, ka page arâ me ka bêrusu i maamu, ma ka page kasia akê na raramohamu raha.

¹⁰Igo ko raramohaga hunigo ma ko tanugi na mena. Igo getego nga ko God monari.

¹¹Araha, gu hagesuriê renigi na obaniha iamu tangê, hanana gê page têtê viteamu bâkoro. Gu katoê, be obahaku henigo, hanana ve tagara tangago i mêrihaku hagenani.

¹²Inê be visigo raha ngavê, Araha God iaku. Inê be hagahigasia tare na atamu, i rongo raha.

¹³Na takuiha tarema iamu tangê ki teha ngavê, suria go bani hagatahiê tenia na matahu.

¹⁴God, na enoni paroparo ka merongasiê. Ngaira ka hagamamasiaga apeta na enoni. Ngaira ka rapasiê, viga nahuiê kê meme, ma ka guguruga tangago.

¹⁵Araha, igo ki na God, go takuira na enoni ma ko korokoro tangara. Igo ko piringiape tare. Karu raha teha na takuiha tarema iamu ma na totosuringa iamu.

¹⁶Gu ahariê ma ku takuiê, ma ku hagaramoniê. Gu hagatahiê na kariamu, suria gê tê viteamu, manga i bani kato na kenaku.

¹⁷Araha, gu hagatanga monari, vi igo ko takuiê. Vikê ka maki na enoni, ga merongasiê, suria go tamaniê ma ko kanukanuê.