Read Kahua KI 89 Bible Online

KI 89 - Kahua bible

KI 89

¹[៨២] Araha, inê be kiria tare na takuiha tarema iamu, ma be tarohenigo tare, vi go hagamonarigi tare na suruha iamu.

²Inê kê bani girara, vi na takuiha iamu ki page goga tare, ki bê ki arâ. Inê kê bani girara, vi na totosuriha iamu ki page oga tare, manga na vavearo.

³Igo ko bani surua tanga o Tavite, ko vi nga: “Inê kê atego ko kariaku, migerua karu suruheri.

⁴Inê kê tohe, vi tâ i tâ na raraha iamu, ma na arahanga iamu ki asa, vige page hato.”

⁵Na vavearo ki hagabângenigi na mena iamu. Na ani, ga tê viteamu, Araha, ka kiria na totosuriha iamu.

⁶I vavearo ki mareha na ani, vige maratoramu. Mareha na ani i pasimu, vige maratoramu, Araha.

⁷Na kaunselo iata na angero ka magutenigo. Ngaira ka ura rihigo ma ka haneava renigo.

⁸Araha God raramohaga hunigo! Ti ki raramohaga manga igo, Araha? Igo ko hagamonarigi tare na tamasinga iamu.

⁹Igo ko araha tanga na asi ramo, ma ko hagapiovagi na asi aputaputa.

¹⁰Igo ko bani botagia na bêna na Ragaba, ma na ega raha ni eraha ngekê ki meme. Igo ko bani tokorenira na merongamu renia na raramohamu raha.

¹¹Na vavearo ma na ano ka na animu. Igo ko bani hagavorara na maveta ma na ara ni marâ hato igê.

¹²Igo ko bani hagavoragi i kerekê ma i kereso. Na hungani i Tabore mi Heremone karu hagabângenia na raramohamu raha.

¹³Igo ko raramohaga teha ngavê! I teha ngavê nikâ na raramohamu!

¹⁴Na ramata ma na otoha ka na hunana na arahanga iamu. Na tauhamu ka hagabângenigi na takuiha ma na monariha.

¹⁵Ga babarisi na enoni, ga rahesigo ma ka kirigo. Igo ko mavesigi na obata, ma ngaira ka vagevagesia na korohamu.

¹⁶Igo ko hagakoro obata i na ara ni tangiani. Ma ngaira ka hagarahasigo renigi na korohamu ma na otohamu.

¹⁷Igami kami ageage renigo, suria go hagaramonigami. Igami kami teha, suria go takuigami.

¹⁸Igo, Araha, ko anumasigami manga na bêata iamami. Igo, God, ga rahesigo na Isiraelita, igo ko bani vategami na maneraha iamami.

¹⁹I nago kere vê noga renia na maruteha igo ko tamasi tanga na kariamu, i toto surigo. Igo ko vi: “Inê kê tamania ta na mane ni hearihatana, i rongo raha na atana. Inê kê atea i berarogata na enoni, ma kê kasia ki maneraha.

²⁰Inê kê kasia o Tavite na kariaku, ki maneraha, suria gê monea renia na oile apuna.

²¹Inê be tamania nga, ki bê ki arâ. Na raramohaku nikâ ki hagaramonia.

²²Ki asa iata na merongana, vige page teharia. Ki asa na enoni era, vige page hagavotaria.

²³Inê be metametarira na merongana. Inê be nahu hunuira na enoni hato, ga kitenia.

²⁴Inê be takuia tare, ma be hagamonarigi na suruha iaku tanga, ma be katoa, ke tehateha tare.

²⁵Inê be hagaraha na arahanga iana, hanana i marungigi na asi ma na ve raha.

²⁶Ngaia ki page vi tangê, ki vivi: ‘Igo ki na vaemaku ma God iaku. Igo ko anumasiê ma ko hagatahiê.’

²⁷Inê be visia, vi na bêbê ni kare iaku, i raha teharira na maneraha getera hato.

²⁸Inê be takuia tare, ki bê ki arâ, ma be hagamonaria na suruheri iaku henia.

²⁹Na raraha iana ki page nganganihaga manga na vavearo, ma na arahanga iana ki asa, vige page hato.

³⁰Ma manga na raraha iana ka haritohegi na ramata iaku ma ka pe arâ surigi na viteaku, inê be hagaitangira renigi na tasi iata.

³¹Manga ngaira, ma ka kasigi vê na hagesuringa iaku ma ka pe marupegi na tauhaku, gê vatera,

³²inê be hagamamasiagara renigi na ginota era.

³³Naka ma, ma inê be takuia nga o Tavite, ma be hagamonaria na suruha iaku tanga.

³⁴I asa be aharêngia na suruheri iaku henia, se vi ve hagaparu renia na ani gi tage na suruha iaku tanga.

³⁵Na tohenga iaku ka tâ ga tâ tare. I asa hagetage, be hagaparua o Tavite.

³⁶Na raraha iana ka goga tare, ki bê ki arâ, mataro me ki meme na arito.

³⁷Na arahanga iana ki page oga tare manga na hageha, i hagaotogi bâkoro na marâ tangara na enoni.”

³⁸Ma igo ko mangariaga tanga na maneraha, go bani atea. Igo ko bani pania ma ko bani kasi renia.

³⁹Igo ko pe hagamonaria na suruheri iamu henia na kariamu. Igo ko bani tavoa na arahanga tenia.

⁴⁰Igo ko bani hogegi na para na hinua raha iana. Ma na ruma nganganihaga ka tâ so i ano.

⁴¹Na enoni hato, ka heraonge, ka hanagogi na nahuninga iana. Na enoni hato i na marê hagarangia ka rurusia.

⁴²Igo ko bani katora na merongana, ka teha, ma ko hagakoro obata.

⁴³Igo ko bani katogi na tarure iana, ka pe aresuria, ma ngaia ki pe teha igê na hearihatana.

⁴⁴Igo ko bani hatungia na arahanga tenia, ma ko kasia hura tenia, vige maneraha.

⁴⁵Igo ko bani katoa, ki gemêa buna, ma ko hagamakia bâraha.

⁴⁶Araha, go page murisigegami tare vari? I arihu manga i he na gi na mangariaganiha iamu?

⁴⁷Igo ko bani girara na mêrihana na enoni ki abubu. Gu takusia, igo ko bani hagavoragami tanga mi meme!

⁴⁸O ti ki mauri tare, mareha vige meme? Ti ki girara i hagatahia marena tenia na matahu?

⁴⁹Araha, igo ko pe takuigami vari manga i nago? Igo ko pe hagamonarigi vari na suruha iamu tanga o Tavite?

⁵⁰Gu takusira na enoni ahuroto. Ngaira ka guharia na kariamu ma ka hagamamasiaga apeku.

⁵¹Araha, na merongamu ka tamasi erasia na maneraha. Ngaira ka guharia na ani go bani atea i na ara ni agua, i arâ igê.

⁵²Mu visia raha tare na Araha! Monari! Monari!