Read Kahua KI 9 Bible Online

KI 9 - Kahua bible

KI 9

¹[៧] Inê be visigo koro, Araha, igê na mêrihaku hagenani. Inê be tamasigi na tagaraha hato iamu, ga babarisigenigi.

²Inê be obakoro, ma be vagevagesigo. Inê be kirigo, be visigo raha, God raramohaga hunigo.

³Matena go ata me, na merongaku ka kariarigu aporo ma ka votavota ka meme.

⁴Na suriha iamu ka koro ma oto, ma igo ko bani suriê maninga inê.

⁵Igo ko bani hagaitangira na enoni, ga pe tongesurigo. Igo ko bani hagaerasira ngavê na enoni, ga erataga. Ma ki asa ta na enoni, vige page takusira nikâ.

⁶Na merongamami ka hatohato hagetage. Igo ko bani hagasuhigi na hinua iata. Ma ki asa ta na enoni, vige page takusira nikâ.

⁷Ma God ki araha tare ma tare ma. Ngaia ki oga so igê na atohana ni suriha.

⁸Ngaia ki marungia bâkoro ma oto na maveta. Ngaia ki surira na enoni igê na otoha.

⁹Na enoni, ga hatamigi na mamasiaganiha, ka gava râ i pasina na Araha. Ngaira ka tahitahi i pasina igê na mateni ni bagabevoani.

¹⁰Na enoni, ga aitangisigo, Araha, ka hagêguri togo renigo. I asa iamu, vigu usitenia na enoni, i avarasigo.

¹¹Mu kiria ma kamu visia raha na Araha, i marungia i Sione. Mu hagarongora na enoni hato i maveta renigi na tagaraha iana.

¹²God ki takuira na enoni, ga hatamigi na mamasiaganiha. I asa iana, vige bonotenigi na enangiha iata na enoni, ga matareha. Ngaia ki hagaitangira na enoni, ga hagamamasiagagi apeta.

¹³Gu takuiê, Araha! Bâsira na merongaku, ga hagamamasiagê. Araha, gu hagatahiê tenia na mera,

¹⁴hanana gê rêra i maata na enoni, ga goga i Jerusaleme. Minê be hagarongora renigi na marâ hato, gê visigo raha renigi. Minê be vagevagesigo, suria igo ko hagatahiê.

¹⁵Na enoni, ga pe tongesurigo, ka sutasuta, ma ngaira mareta ka votavota igê. Ngaira ka tu mareta igê na tu rikiriki iata.

¹⁶Na Araha ki hagabângenia marena renigi na suriha oto iana. Na enoni, ga erataga, ka tutu igê na bagatarihata mareta.

¹⁷Na enoni hato, ga erataga, ka page magahuru. Ka page meme na enoni hato, ga kitenia God na Araha.

¹⁸I ta na tangiana na enoni, ga matareha, ka page tarahua na hetamaniha. I asa iata na enoni matareha, vige page hagêguri baranga.

¹⁹Araha, gu râ me, hanana siana na enoni era ka teharigami! Gu hagahakura me i maamu na enoni, ga pe tongesurigo, ma ku surira.

²⁰Araha, gu hagamagusira. Gu hagagirarara, vi ngaira ka na enoni ma.