Read Kahua KI 90 Bible Online

KI 90 - Kahua bible

KI 90

¹[៨៣] Haganega me tenia i nago kere vê noga igo ko marupegami tare.

²Hagenago tarani na hungani ma na maveta, go hagavoragi, igo ko God ma ko bani goga ma ko page God tare, mareha ki hatohato.

³Igo ko katora na enoni, ka vora aporo renia na marâ, ga vora tenia, ma ko horora, ka vora aporo renia na mako.

⁴Tangago igo na rehagaro na harisi ka manga na tangiana gi tage togo. Ngaigi ki manga i na nora, i bani hato, se manga na kere matena igê na bungiana.

⁵Igo ko hagamagahurugami manga na maganuha i toregami. Igami kami manga na maruteha, i hata ni magahuru. Igami kami mangagi na rauga purua, ga baugo igê na maveraro.

⁶Ngaigi ki akê ma ki takataka. Ngaigi ki maugu ma ki meme i manurahi.

⁷Na mangariaganiha iamu ki erasigami bâraha. Igo ko hagamagusigami ngavê renigi na hagaitangiha.

⁸Igo ko takusigi na parongamami era. Igo ko nakagi mave na tasi pinihi iamami.

⁹Na mangariaganiha iamu ki hagabubugi na maurihamami. Ngaigi ki magahuru manga na kere manavasua.

¹⁰Na tangahuru gi pi ma na harisi, kami mauri surigi, se na tangahuru ge varu na harisi, manga mi ramoramo. Ma surigi na harisi ngegana ka tarahugami ma igê na anumanumaha na ma mamasiaganiha. Na maurihamami ki hata ni hatohato, ma igami kami magahuru.

¹¹Ti ki aitangisia hagenani na mangariaganiha iamu? Ti ki girara hagenani na maguha tenia na managariaganiha raha iamu?

¹²Vikê, gu hagesurigami renia na abubuhana na mêrihamami, hanana mi otooto surigami maremami.

¹³I na keta ki page hato igê na mangariaganiha iamu? Araha, gu takuigami, na kariamu.

¹⁴Gu katoa na takuiha tarema iamu ke angarigami igê na ara ni maveraro. Vikê igami kami kiki ma kami vagevage tare surigi na mêrihamami hagenani.

¹⁵Igo ko bani hagarugu obamami surigi na harisi rako, mi oga surigi igê na mamasiaganiha. I ngekê gu hagakoro obamami surigi na harisi, ga tagenani henigi.

¹⁶Gu hagabâsigami, na kariamu, renigi na mena iamu. Gu hagabâsira na karemami renia na raramohamu raha.

¹⁷God Araha iamami, gu korokoro tangagami. Gu katogami, gami tavoraha bâkoro igê na ara ni marâ hato, mi katogi.