Read Kahua KI 91 Bible Online

KI 91 - Kahua bible

KI 91

¹Na ani ma na enoni, i rukuruku i pasina na Araha ma ki goga i marungana God raramohaga hunia, ngaia ki ape tatara.

²Ngaia ki girara i vi tanga God, ki vivi: “Igo ki na tahingaku, go anumasiê. Igo ki na God iaku, gê hagêguri togo renigo.”

³Ngaia ki page hagatahigo, manga na manu tenia na basu, ma tenigi nikâ na mera na ringa.

⁴Ngaia ki page marupego, manga na kua, i abahira na kere karena. Igo ko page ape tatara i pasina, mangara na kere kua, ga rukuruku i bebena kenata. Na totohesuringa iana ki page anumasigo, manga na bêata, i hagatarahi ora.

⁵I asa, vigu magutenira na ataro igê na bungiani, se na ani ma na eraha, i hagagasuganira na enoni igê na tangiani.

⁶I asa, vigu magutenigi na ringa ma na mera, ga gamorahira na enoni surigi na bungiani, se na eraha, i nahuira surigi na tangiani.

⁷Naka ma ga meme rako ngavê na enoni rihigo, naka ma vi na rehagaro ma na rehagaro, ma igo, ki asa hagetage, vigu mamari.

⁸Renigi na maamu maremu igo ko page rigia na Araha, i hagaitangira ngavê na enoni era.

⁹Igo ko bani atea God na Araha, i teha, hanana i anumasigo ma ki têtê surigo.

¹⁰Tahema na eraha ki asa, vige tarahugo, se na bagabevoani, vige tarahua na hinua iamu.

¹¹God ki page nakara na angero iana, ka bâbâsurigo, ma ka anumasigo igê na ara ni agua, go arâ igê.

¹²Ngaira ka page têgo akê, hanana siana ko tapasu.

¹³Igo ko page purira so na ma ma na o vasiga, na o ramo ma na ma garagara hunu.

¹⁴God ki vi: “Inê be hagatahira na enoni, ga takuiê. Inê be anumasira na ani, ga visiê, vi inê ki na Araha iata.

¹⁵Inê be aganarira, matena ga avarasiê. Inê be tamanira igê na mamasiaganiha iata, ma be hagatahira ma be kasira akê aporo.

¹⁶Inê be vatera ke mauri arihu, ma be hagatahira.”