Read Kahua KI 92 Bible Online

KI 92 - Kahua bible

KI 92

¹[៨៤] I arari ngavê, mi visigo koro, Araha, ma kami ki kami hagarahasigo, God Araha teha.

²I arari ngavê, mi tarohenia na takuiha tarema iamu i na ara ni mavoraro. I arari ngavê, mi tarohenia na totosuriha iamu i na ara ni manurahi.

³I arari ngavê, mi visigo raha, matena mi tarugigi na gita ma na ukalele.

⁴Araha, na tagaraha raha iamu ka hagakoro obaku. Inê kê kiki vagevage renigi na tauhamu.

⁵Araha, na tauhamu ka bagararaha teha. Na takoha iamu ka mataha teha ngavê.

⁶Na enoni, ga bonobonoga ma ka bagatatako, ki asa, vige rongogirara na tarana ngekê.

⁷Vari na enoni era ka mauri ramo mangagi na rauga, ma na enoni na bagatarihata ka nahunia na ramana. He naka i manga ngekana, ma igo, God, ko page hagaerasira hagetage ngavê,

⁸suria igo ko Araha teha tare ma tarema.

⁹Igami kami bani girara, vi na merongamu ka page meme. Ma na enoni era hato ka page votavota, Araha.

¹⁰Igo ko bani hagaramoniê, manga na puruka vasiga, ma ko bani hagakoro obaku.

¹¹Inê kê bani bâsira na merongaku, ga votavota, ma kê bani rongora na enoni era, ga angiangi.

¹²Na enoni, ga tê viteana na Araha, ka page mauri koro, mangagi na ao se na apinige raha i Libanone.

¹³Ngaira ka mangagi na apinige, ga bani hasigi i ruma iana na Araha ma ka akê bâkoro i Ruma ni Rotu iana God iaka.

¹⁴Ngaigi ki hunguhungu tare, ki bê ki arâ, ma ka maravarava ma ka ramoramo tare.

¹⁵Na tarana ngekê ki hagabângenia, vi na Araha ki oto na tauhana. I asa hagetage, vige pe oto na parongana. Ngaia ki anumasiê.