Read Kahua KI 94 Bible Online

KI 94 - Kahua bible

KI 94

¹Araha, igo ki na God, go hagaitangira na enoni era. Gu hagabângenia na mangariaganiha iamu.

²Igo ko surira na ara ni enoni hato. Gu vatera na enoni, ga paroparo, na hagaitangiha, i ararira.

³I na keta ki page hato igê na vagevageha iata na enoni era? I arihu mênga vari, Araha?

⁴I na keta ki page hato igê na paroparoha iata na manero? I na keta ngaira ka page hato igê, vige ageage renigi na bagatarihata?

⁵Araha, ngaira ka purira so i ano na kariamu. Ngaira ka hagamamasiaga apeta.

⁶Ngaira ka nahuira ka me na gete, ga nâ, ma na kare banogo ma na mahuara, ga oga i pasimami.

⁷Ngaira ka vi: “Na Araha, ki asa, vige bâsigia. God, na Isiraelita ka rahesia, ki asa, vige rigigia.”

⁸Kariaku, igamu kamu bonobonoga ngavê! I asa iami, vigamu takotako sisite vari?

⁹God ki vategia na karingaka. Ngaia ki pe rongorongo vari? Ngaia ki vategia na maaka. Ngaia ki pe bâbâ vari?

¹⁰Ngaia ki hagaotora na enoni i maveta. Ngaia ki pe hagaitangira vari? Ngaia ki hagesurira na ara ni enoni hato. Ngaia ki hite vari?

¹¹Na Araha ki bani giraragi na aitangihata. Ngaia ki bani girara, viga takotako bekabekaga.

¹²Araha, ga babarisi na enoni, go hagaotora, ma ko hagesurira renigi na ramata iamu.

¹³Igo ko hagamamarora tenigi na bagabevoani, mataro me ko sutasuta karira na enoni era.

¹⁴Renia na Araha ki asa, vige rumakaka renira na kariana. I asa iana, vige panira na anina.

¹⁵Na suriha igê na kotiha ka page oto aporo. Ma na enoni hato, ga tê viteana God, ka page aganaria na otoha.

¹⁶Ti ki tamaniê pusira na enoni era? Ti ki panepane heniê pusira na ani ga erataga?

¹⁷Manga vi na Araha, ma ke pe bani tamaniê, inê be bani me rêrê.

¹⁸Matena gê sugi votavota noga, igo, Araha, ko tauê, suria go takuiê tare.

¹⁹Na ara ni mateni gê takoha bâraha ma kê anumanuma, igo ko hagarekoniê ma ko hagakoro obaku.

²⁰Igo ko tora getego hagetage tenira na maneraha, na suriha ga pe oto. Igo ko tora getego hagetage tenira na maneraha, ga nakagi na ramata, ga hagagatagatanigi na tarani, ga pe oto.

²¹Ngaira ka harikato renira na enoni, ga koro, ma ka surira bera ka meme na enoni, ga pe tanugi ta na marâ, ga era.

²²Ma na Araha ki anumasiê, ma inê kê rukuruku i pasina God iaku.

²³Ma ngaia ki page hagaitangira renigi na bagatarihata, ma ki page hagamagahurura renigi na tasi iata. Na Araha God iaka ki page hagaerasira ngavê.