Read Kahua KI 96 Bible Online

KI 96 - Kahua bible

KI 96

¹Mu kiria na Araha igê na ki haoru. Maveta hagenani, mu kiria na Araha!

²Mu kiria na Araha ma kamu hagarahasia. I na ara ni tangiani mu tarohenia, vi ngaia ki bani hagatahigia.

³Mu tarohenia na raramohana raha tangara na enoni hato i maveta. Mu tarohenigi na tagaraha raha iana tangara na enoni hatohato.

⁴Na Araha ki teha. Ki tuguhigia, ga hagarahasia bâraha ma ka magutenia teharira na ataro hato.

⁵Na ataro iata na enoni getera hato ka na marâ purua. Ma na Araha ki hagavoragi na vavearo ma na bevoa tatara.

⁶Na Araha ki bâ hanetaga ma ki bagararaha. Na raramohana ma na bâkorohana karu raro i Ruma ni Rotu iana.

⁷Igamu hato na enoni i maveta, mu hagarahasia na Araha, ma kamu hagahigasigi na bâbâhana ma na raramohana.

⁸Mu hanitasia na Araha, i rongo raha na atana. Mu bêbanu i Ruma ni Rotu iana ma kamu vogasia.

⁹Mu rahesia maninga God na Araha. Maveta hagenani, mu haneava renia.

¹⁰Mu hagarongora na enoni hato i maveta, vi God ki Araha, i teha. Ngaia ki naka na maveta ki nganganihaga igê na atohana, ma ki asa, vige guru râ tenia. Ngaia ki page surira na enoni hato igê na otoha.

¹¹Na ano ma na vavearo, muru obakoro! Na asi ma na ega hato igê, mu ngere vagevage!

¹²Mu ma na ngêra igê, mu ageage! Na apinige i bemu ka page ngere vagevage

¹³i maana na Araha, matena i arâ me, ki marungia na maveta. Ngaia ki page surira na enoni hato i maveta igê na otoha ma na monariha.