Read Kahua NA MARAMARÊRAVA 1 Bible Online

NA MARAMARÊRAVA 1 - Kahua bible

NA MARAMARÊRAVA 1

¹Igê ka na maramarêrava iana na maneraha o Solomone karena o Tavite.

²Ngaigi ka girara, ga vatego renigi na takoha mataha tanga na ogaha koro ma na hagaotonga koro, ma ka tamanigo ko girara erasigi ngavê na marâ.

³Ngaigi ka girara ga hagaotogo igê na ogaha bâkoro, igê na monariha, igê na otoha ma na koroha.

⁴Ngaigi ka girara ka katoa na enoni i bonoani, ki takotako mataha, ma ki katoa na enoni haoru, ki hagakitagi na giraraha.

⁵Na maramarêrava ngegê ka girara ga hagarahagi na giraraha iata na enoni ga tako mataha ma ka girara ga hagaotora na ani ga hagesuri.

⁶Vikana ngaira ka girara ga aitangisigi na girarani ga pinihi igê na maramarêrava, na tamasinga maramaraveta iata na enoni ga tako mataha, ma na hagahi iata.

⁷Manga go obania, vigo nahunigi na takoha mataha, hoi, i tuguhigo, vigo hagahigasia na Araha. Na enoni i pe hagahigasia na Araha, ngaia ki kikitenigi na takoha mataha tanga na ogaha koro ma na hagaotonga. Tahema ngaia ki bonobonoga.

⁸Kakare, gu tê viteaterua o vaemamu ma kenamu. Siana ko ngaritenigi na hagaotonga iaterua.

⁹Na tê vitana iaterua ki hagabâkorogo manga na tarepuri bâkoro i bêmu, se na mamahe i riomu.

¹⁰Kakare, manga na enoni ga bagatauhata ma ka unigo vigo arâ henira, siana hagatege.

¹¹Manga ngaira ma ka vi tangago, ka vivi: “Nika, ge râ ke nahuia ke me na enoni. Ge gamorahia ke nahu hagabamata renia. Ke koro na apeka!

¹²Gu râ me! Ngaia ki bara vige tahi. E, ma na matena ga tarahua, ngaia ki bebeve ma ki ageagesia na ogaha iana. Matena ga hagamesia hato, e, na anoano ki guru me!

¹³E, ga page rurugugi na ruruguha iana. E, ma ka hagavunusigi na ruma iaka renigi!

¹⁴Râ me vego! Igia ka tonganigi!”

¹⁵Kakare, siana ko hakurira. Go hinaru!

¹⁶Ngaira ka pe kakaviaga vige bagatauhata. Ngaira ka pe magutenia na nahunga ni nuni.

¹⁷Na manu ki bara vige banu igê na basu manga vi bâsigo go gasia tanga.

¹⁸Ma ngaira ka naka na basu ma ka hagarateta mareta hete ma ka me igê.

¹⁹Tarema na nahunga ni nuni ki apariri bê aporo tangara na manero. Na tarana ngekê ki tarahua na ani mavê na enoni i gâga sutaga.

²⁰Rongo! Na takoha mataha ki tamasi raha igê na tara ma na mahera i hinua.

²¹Ngaia ki ngere raha igê na maanipara ni hinua ma igê na tavani hakuta.

²²Ngaia ki vi: “Enoni mu beka! Mu beka taraha? Na bonobonoganiha ki hagamugamu taraha? Mu tavoheriga taraha na giraraha monari? I keta mu kahu girara?

²³Mu karingê, matena gê ramonigamu. Inê be hagaotogamu ma be hagatarêngenia na giraraha iaku tangagamu.

²⁴Inê kê unigamu makira! Inê kê karuhigamu makira!

²⁵Na ara ni hagaotonga iaku tangagamu ka sisiri i muri bêmi. Na hagararinga iaku tangagamu igamu kamu usitenia ngavê.

²⁶Tahema, matena ga tarahugamu na bagabevoani, hoi, inê kê rurusigamu nogaku. Inê kê megamumarabe nogaku.

²⁷Matena ga nahuigamu na anumanumaha manga na roga raha se na maguara, matena na maguha ki hagabubununugamu ma ka gisigisi na bunaniami,

²⁸vikana igamu kamu page avarasiê, inê na takoha mataha, ma inê ki asa ngavê vi ve aganarigamu. Igamu kamu page gari makira reniê,

²⁹suria igamu kamu usitenigi tare na giraraha iaku ma kamu haritohea tare na Araha.

³⁰Igamu kamu ngaritenigi tare na hagaotonga ma na hagararinga iaku.

³¹Hoi, na agua mu garia ngekana! Mu hatamigamu?

³²Na guguruganiha iata na ani ga bonoani ki bêngenira tanga na mera, suria ngaira ka usitenia na takoha mataha. Na enoni ga bekabekaga, na bekaniha iata ki hagamesira.

³³Ma na enoni ki têtê viteaku, ngaia ki gâga suri parongana. Ngaia ki gâga asitatara tenigi na maguha ma na anumanumaha.”