Read Kahua NA MARAMARÊRAVA 10 Bible Online

NA MARAMARÊRAVA 10 - Kahua bible

NA MARAMARÊRAVA 10

¹Igê nga ka na maramarêrava iana o Solomone: Na kare mane i tako mataha, ngaia ki katorerua na enana karu vagevage, ma na ani i bekabekaga ki hagamamasiagarerua.

²Na ruruguha go nahunigi, suria go hagahagabeka, ki asa hagetage vige tamanigo. Na monariha ki girara i hagatahigo.

³Na Araha ki pe nakara na ani ga tê viteana, ke mesi magêha, ma ki nakara na ani ga era ma ka mâmângoga ki marehasira na marâ ga obanigi.

⁴Na babaganiha ki page katogo ko matareha. Na tagaraha ramo ki page katogo ko ruruguha.

⁵Na ani i nahuni takoha, ngaia ki totora na ngêra matena ga mariri. Na ani i tâ ma ki mauru matena ga mariri, ki araria viga hagamakia.

⁶Tanga na ani i koro, na marâ koro ka page tarahua. Ma na ani i era ki hagaratena marena.

⁷Ga takusira na enoni ga koro renigi na korohata ma ka hitenira rêrê na enoni era.

⁸Na enoni ga nahuni takoha mataha ka aganarigi na hagaotonga koro. Ma na enoni ni bekabekaniha ka ararami bê aporo ma ka hagarateta mareta.

⁹Na enoni i oto na ogaha iata ka asitatara ma ka oga purunguni. Ma na ani ga hagahagabeka ka page tahetara renira.

¹⁰Na enoni ga tokorenigi na hagaparunga ka hagamamasiagara na enoni getera ma ka hagarateta mareta.

¹¹Na tamasinga iana na enoni koro ka manga na ve banga ni mêriha, ma na tamasinga iana na enoni era ka hagamamasiagara na enoni.

¹²Na hekiteniha ki hagavorea na hekorekoreana ma na hetakuiha ki hagamanagi na ara ni eraha.

¹³Na enoni i nahuni takoha ki tamasi takotako ma na ani ga bekabekaga ki arari ga ramusira.

¹⁴Na enoni ni takoha mataha ki nakagi so na giraraha iana tanga na matena i araria vi tamasi. Ma na ani i bekabekaga ki asa vige muni na harana ma ka akê me ma na eraha.

¹⁵Na enoni i ruruguha ki nahuni ramoha ma na enoni i matareha ki mareha rârâ.

¹⁶Na koroha ki apara na koroha ma na eraha ki apara na eraha.

¹⁷Na enoni ga aganarigi na hagaotonga ngaira ka râ suria na tara ni mêriha. Ma na ani ga usitenigi na hagaotonga ngaira ka hagatasia na tara.

¹⁸Na ani i kitenia na tamana ma ki pinihia, ngaia ki bagasusuka. Na ani i toratora tamasinga, ki bekabekaga.

¹⁹Na enoni i manitavaragi ki pe asa tanga vige tasi rêrê. Ma na ani i tako mataha, ki pe tamasi bâraha.

²⁰Na tamasinga iana na enoni koro ka mangagi na siliva taranini. Ma na takoha iana na enoni era ka na rogaroga purua.

²¹Na tamasinga iana na enoni koro ka tamanira rako na enoni. Na ani ga bekabekaga ka mesi bekabekaniha.

²²Na korohana na Araha ki katogo ko ruruguha mareha vi na tagaraha ramo.

²³Na ani i bekabekaga ki vagevagesigi na bagatauhana. Na ani i nahuni takoha ki vagevagesia na takoha mataha.

²⁴Ki page tarahua na enoni era na marâ i magutenia, ma na enoni i tê viteana God ki page nahunia na marâ i barigia.

²⁵Na roga raha ki rogatenira vê na enoni era ma na enoni koro ka tahi tare.

²⁶Siana ko naka na enoni i babaga ki tagara tangago. Ngaia ki manga na marâ i mangurigo se i rubuhigi na maamu.

²⁷Na enoni i hagahigasia na Araha ngaia ki page mauri arihu. Ma na enoni era ka meme buta.

²⁸Na vagevageha ka na marâ na enoni koro ka girara ga naasia. Ma na enoni era ki asa ge girara vige naasia ta na marâ.

²⁹Na Araha ki anumasira na ani ga totosuria, ma ki hagamagahurura na ani ga erataga.

³⁰Na enoni koro ka page gâga suri parongata tare ma na enoni era ka page magahuru.

³¹Na enoni koro ka tamasi igê na takoha mataha ma na meata na enoni era ka page retegi râ.

³²Na enoni koro ka tamasigi na tamasinga koro ma na enoni era ka tamasigi na hagahagaparunga.