Read Kahua NA MARAMARÊRAVA 11 Bible Online

NA MARAMARÊRAVA 11 - Kahua bible

NA MARAMARÊRAVA 11

¹Na Araha ki kitenira na ani ga hagahagaparu renigi na higahigani na marâ tangagi na vuriha ma na hagavuringa, ma ki vagevagesigi hete na higahigani oto.

²Na paroparoha ki hagaratena na makiha. Na haritagiha ki hagabângenia na takoha mataha.

³Na monariha ki bêngenira na enoni ga koro ma na hagaparunga ki hagaerasira ngavê na enoni ga hagahagaparu.

⁴Igê na tangiana ni suriha na ruruguha iamu ki asa vige hagatahigo, nga noga ma na otoha ki girara i hagatahigo.

⁵Manga igo ma ko korokoro ma ko ototo i mataku ma tanga na ogaha iamu vi arâ ototo. Ma ki manga igo ma ko era, igo ko hagaratemu maremu renia na eraha.

⁶Na paronga koro ma oto ki page hagatahia na enoni, ma na ani i hagahagaparu suria ma na vanasiha iana ngaia ki page hagaratena marena renia.

⁷Matena na enoni era ki meme ngaia ki migime na naasiha iana. Manga go hagêguritogo renigi na ruruguha, igo ko hagêguritogo hagaborâ ma.

⁸Na enoni koro ki asitatara tenigi na bagabevoani ma na enoni era ki hatamigi ngaia hete.

⁹Na tamasinga iata na ani ga rumakaka renia God ngaigi ki girara ga hagaerasigo. Ma na takoha mataha iata na ani ga toto suria God ngaigi ka girara ga hagatahigo.

¹⁰Manga vi na marâ ma ka tavoraha bâkoro tangara na enoni koro, na hinua hagenani ki vagevage, ma ki ngerengere vagevage matena ga meme na enoni era.

¹¹Na enoni koro ka katoa na hinua ki tavoraha bâkoro ma na tamasinga iata na enoni era ki hagaerasia na hinua.

¹²Na enoni i tamasi ruhira na enoni ngaia ki bekabekaga. Na ani i tako mataha ki munimuni ma.

¹³Na ani i tabotabohara ki tamasi tararu. Ma na enoni i asa vige tamasi tararu ko girara go hagarongoa renia na marâ go obania vi pinihi.

¹⁴Manga na enoni ma ka pe nahunira na enoni vige bêngenira koro, na haku iata ki page magahuru. Manga ga gâga rako na enoni koro ni hagaotonga, hoi, na enoni ka gâga suri parongata.

¹⁵Manga go hurahura pusia na hagaba iana na mahuara igo ko page hagahunu. I ararigo hete vigo bani naka vê.

¹⁶Ga hagahigasia na gete i toto suria o vaniana ma na êrâ ki katoa na makiha. Na ani i babaga ki marehasia tare na haga. Ma na ani ga ramoramo tangagi na haga ngaira ka page ruruguha.

¹⁷Na enoni i korokoro tanga na ani getea, ngaia ki korokoro so tanga marena. Manga go hagamamasiaga na ani getea, igo ko hagamamasiagago so maremu.

¹⁸Na tagaraha iata na enoni era ka hagavoregi ma na eratani. Ma na enoni i paronga koro ma oto ngaia ki page nahunia na mena koro.

¹⁹Na enoni i togeaga ki paronga koro, ngaia ki page mauri, ma na ani i togeaga ki bagaparonga, ngaia ki page meme.

²⁰Na Araha ki kitenira na ani ga bagatauhata tare ma ki takuira na ani ga paronga koro.

²¹Na hagaitangiha ki asa vige tihira na enoni era ma na enoni koro ki mareha rârâ.

²²Na bâkorohana na gete i pe nahuni takoha ki manga na eburungi na golo i barisuna na bo.

²³Na marâ na enoni koro ga obanigi ka hagavoregi na marâ koro, ma na marâ na enoni era ka tenigi ka hagamangarira na enoni getera.

²⁴Tani na enoni ka mahatangenigi na haga iata. Henaka ma ngaira ka ama ni ruruguha nga. Tani ka maongo renigi na haga iata. Henaka, ma ngaira ka ama ni matareha nga.

²⁵Gu mahata ma hanana go page nahunia na ramana. Gu tamanira na enoni getera ma hanana go page tarahua na hetamaniha bê aporo.

²⁶Na enoni ka visia bera na ani i pe obania vige hagavuri ngêra, suria i naasia na matena i raharaha igê na meni na ngêra. Ma na enoni ka visia koro na ani i hagavuri ototo râ.

²⁷Manga go tabea na koroha, God ki page korokoro tangago. Ma manga go tabea na eraha, na eraha ki page tarahugo.

²⁸Na enoni ga hagêgurigi ma na ruruguha iata ka mangagi na ahani na apinige ga turituri. Ma na ani ga hagêguria God ka page mauri mangagi na ahani na apinige ga surusuru tare.

²⁹Na mane i pe botage renigi na ahemata ma na nahuninga iana ngaia ki page nahunia na roga purua ma. Na mane bekabekaga ngekana ki page vora re na kare rakuraku iana na enoni i nahuni takoha.

³⁰Na enoni i tototo suria God ngaia ki hagavorea na mauriha, ma na ani i gâga sutaga ki hagamesia na mêriha.

³¹Na enoni ga tê viteana God ka nahunigi na meta i maveta ikê. Ma ki tagenana ma tangara na ani ga erataga ma ka murisigea God. Na meta ka na hagaitangiha hete.