Read Kahua NA MARAMARÊRAVA 12 Bible Online

NA MARAMARÊRAVA 12 - Kahua bible

NA MARAMARÊRAVA 12

¹Na enoni i obania na giraraha, ngaia ki obanira na enoni viga hagaotoa, matena i pe arâ bâkoro. Ma na ani i usitenia na hagaotonga ngaia ki bekabekaga.

²Na Araha ki vagevagesira na enoni koro ma ki hagaitangira na ani ga hagavoregi ma na eraha.

³Na enoni era ka page vota ma na enoni koro ka page rêra nganganihaga manga na apinige ga so na vagani.

⁴Na gete koro ki manga na tarepuri iana o vaniana, ma na gete i hagamakia o vaniana, ngaia ki manga na bagamaeha raha i ngaua na apena o vaniana.

⁵Na enoni koro ka katogo maninga ma na enoni era ka obania ma viga hagahagaparugo.

⁶Na tamasinga iata na enoni era ka hagamesira na enoni, ma na anita na enoni koro ka hagatahira hete.

⁷Ga page hagamagahurura na enoni era tenia na maveta ma na ruma iata na enoni koro ka page gâga hagahu.

⁸Manga igo ka na enoni ni takoha koro, na enoni ka kasigo akê. Manga igo ma ko bekabekaga, na enoni ka ruhigo.

⁹Manga igo ka na enoni purua ma ma ko tagara ko nahuni ngêra ga arari, igo ko teharia na ani i hagabângenia vi ruruguha ma hete i marehasia na ngauha.

¹⁰Na enoni koro ka marupera maninga na togoha iata ma na enoni era ka hagamamasiaga apeta ma na anita.

¹¹Na enoni i tagara ramo i mu iana ngaia ki nahunigi rako na ngêra, ma na ani i gagaha na bêna ki pe nahuni takoha koro.

¹²Na enoni era ka vanasigi ma na tarani ga pe koro, ma na enoni koro ka akê me manga na apinige i hungu bâkoro.

¹³Na enoni i hagaparu ki tutu igê na hagaparunga iana marena ma na enoni ni monariha ki mareha.

¹⁴Na memu ka ararigi na tauhamu ma na tamasinga iamu. Na marâ go atea ngaia noga.

¹⁵Na enoni bekabekaga ki takusia vi ngaia ki ototo tare, ma na enoni ni takoha ki aganarigi na hagaotonga.

¹⁶Na enoni i bekabekaga ki mangariaga rêrê, matena i pe obania ta na marâ. Ma na enoni i nahuni takoha, ki munia so ma.

¹⁷Matena go tamasi igê na monariha igo ko katoa na otoha. Ma na hagaparunga ka hagavoregi ma na tarani ga pe oto.

¹⁸Na bagatamasinga ka mangagi na tatapa borahu ga kumukumu i apeta na enoni. Ma na tamasinga takotako ka girara ga hagamavogi na maara.

¹⁹Na monariha ki asa vige page hato. Ma na hagaparunga ki hatohato matena i rangaranga.

²⁰Na hagaparunga ki gâga igê na aitangihana na enoni era, ma na enoni i tangasia na marapeha ngaia ki tarahua na vagevageha.

²¹Na bagabevoana ki asa vige tarahua na enoni koro ma ki aharêsia hete na enoni era.

²²Na Araha ki kitenira na enoni ni hagaparunga ma ki obakoro renira hete na ani ga hagamonarigi na tamasinga iata.

²³Na enoni ni takoha ka munigi so noga na giraraha iata, ma na ani ga pe nahuni takoha ka hagabângenigi na bekaniha iata.

²⁴Na tagaraha ramo ki page vatego re na ramoha ma ki manga go babaga igo ko page vora re na kare rakuraku.

²⁵Na anumanumaha ki hagamamasiagago ma na tamasinga ni haganakuha ki hagakoro obamu aporo.

²⁶Na enoni koro ki bêngenia na tamana suria na tara oto, ma na enoni era ki katoa na tamana ki hagatasia na tara oto.

²⁷Na enoni i babaga ki asa vige tarahua na bo i hagavasi tanga ma ki manga go tagara ramo igo ko page nahunigi rako na marâ.

²⁸Na otoha ma na koroha ka na tara tanga na mauriha ma na eraha ki na tara tanga na mera.