Read Kahua NA MARAMARÊRAVA 13 Bible Online

NA MARAMARÊRAVA 13 - Kahua bible

NA MARAMARÊRAVA 13

¹Na kare i nahuni takoha ki aganarigi na hagaotonga iana o vaemana. Ma na ani i bâ bêso renira na enoni ki asa ge vi, vi ngaia ki tasi.

²Na enoni koro ki mauri renigi na takoha mataha ma na enoni era ka magêsigi ma na ogasutaganiha.

³Gu tamasi takotako, hanana go anumasigo maremu. Na enoni i bagatamasi ki hagaratena marena.

⁴Na enoni i babaga ki asa vige nahunia ta na marâ, henaka vi rapasigi bâraha. Ma na enoni i tagara ramo ki page nahunigi na marâ i obanigi.

⁵Na enoni ni monariha ki kitenigi na hagaparunga ma na enoni ni hagaparunga ki hagaerasia ma ki hagamakia so marena.

⁶Na paronga koro ki bêngenira na enoni koro suria na tara i oto, ma na eraha ki hagavotarira na enoni tasi.

⁷Tani na enoni ka maramara enoni ruruguha ma ngaira ka baguru hete. Tani ka maramara enoni matareha ma ngaira ka ruruguha hete.

⁸Na enoni i ruruguha ngavê ki ngahingahi renigi na haga iana ma na enoni matareha ki mareha.

⁹Na enoni koro ki manga na laiti i mave bâkoro ma na enoni era ki manga na laiti i piripiringi na maana ma ki me.

¹⁰Na enoni i takusia, vi ngaia ki girara teharira na ani getera, ngaia ki hagareke tangara na enoni. Ma na enoni i aganaria na hagaotonga ki mareha.

¹¹Na ruruguha ga arâ me purua tangago ngaigi ki page soso rêrê, ma na ruruguha go tagara bâraha tangagi ngaigi ki page akê haharitagi.

¹²Manga go nanasi baguru, igo ko ape era. Manga go nanasi togo, igo ko vagevage ngavê.

¹³Manga go usitenia na hagaotonga koro, hoi, igo ko page tarahua na bagabevoana. Ma ki manga go aganaria, hoi, igo ko page asitatara.

¹⁴Na hagesuringa iata na enoni ni takoha ka mangagi na ve banga ni mêriha. Ngaigi ki tamanigo ko tahitahi tenigi na basu na mera.

¹⁵Manga go nahunia na takoha koro na enoni ka hagahigasigo, ma na hagaparunga ki asa vige hagatahigo.

¹⁶Na enoni ni takoha ki katogi takotako na marâ. Na enoni i pe nahuni takoha ki hagabângenia na bekabekaniha iana.

¹⁷Na enoni tora tamasinga ga hagahagaparu ngaira ka hagavoregi ma na eraha, ma na ani ga tamasi monari ngaira ka hagavorea na marapeha.

¹⁸Na enoni i usitenia na hagaotonga ngaia ki page matareha ma ki maki ma na ani i aganarigi na hagaotonga ka page hagahigasia.

¹⁹Manga i togotogo na barigiha iamu, e, igo ko vagevage ngavê! Ma na enoni ga bekabekaga ka vanasigi ma na eraha.

²⁰Manga go hakunira na enoni ni takoha igo ko page nahuni takoha mataha. Manga go hakunira na enoni ga bekabekaga, na tarana ngekana ki page erasigo ngavê.

²¹Na eraha ki tarigenira tare na ani ga bagatauhata ma na meta na enoni koro, ngaigi ka na marâ koro.

²²Na esina na enoni koro ka page nahunigi na nahuninga iana. Na enoni koro ka page nahunigi na nahuninga iata na enoni tasi.

²³Na enoni matareha ki oto tangara viga tagarahia na mu igê na mako i oga purua hanana ga mauri re. Ma ki pe oto vi na avanuna na mako vi ge manimania tenira.

²⁴Manga go pe hagaitangia na karemu igo ko pe takuia. Manga go takuia, hoi, igo ko hagaotoa.

²⁵Na enoni koro ki girara i togotogo na obaniha iana ma na enoni era ki hagatage tare.