Read Kahua NA MARAMARÊRAVA 14 Bible Online

NA MARAMARÊRAVA 14 - Kahua bible

NA MARAMARÊRAVA 14

¹Na gete ni takoha ki katoa na ruma ki hagagara koro ni ogaha ma na gete bekabekaga ki hagaerasia.

²Manga na ogaha iamu ma ki koro i maana God igo ko hagabângenia vi igo ko hagahigasia na Araha. Manga i mareha, ki mareha.

³Na enoni bekabekaga i paroparo ki hagaratena marena suria i manitavaragi. Na tamasinga iana na enoni ni takoha ki manga na bêata iana.

⁴Manga go pe nahunira na puruka ni tagaraha i mu na ruma ni ngêra iamu ki baguru. Ma ki manga go nahunira ngaia ki vunuvunu mamasuaga.

⁵Na enoni ni monariha ki tamasigi na monariha igê na kotiha ma na enoni ni hagaparunga ki hagaparu ma.

⁶Na enoni i bâ bêso renira na ani getera ki asa iana vige vora re na enoni ni takoha mataha, ma ki mataku ma hete tanga na ani i nahuni takoha.

⁷Siana ko hakunira na enoni ga bekabekaga, suria ngaira ka hite vige hagesurigo.

⁸Na enoni ni takoha ki girara i arâ suria na otona na tara. Ma na bekabekaniha ki katoa na ani i bekabekaga ki hagatasia na tara.

⁹Na enoni bekabekaga ka tako hagamamahasigi na tasi ma na enoni koro ka obanigi na hagaotonga.

¹⁰Na vagevageha ma na obaruguha igê na aitangihamu igo getego ma ko aitangisigi maninga. Mareha rârâ vi ta na enoni râ nikâ.

¹¹Na ruma iana na enoni era ki page aruhuruhu ma na anina na enoni koro ki page tavoraha bâkoro.

¹²Na tara go takusia vi i koro, vari ngaia ki bêngenigo tanga na mera.

¹³I pe asa na enoni i mamana, vige rugu na obana. Matena i hatohato na vagevageha na obaruguha ma ki gâga so.

¹⁴Na enoni era ka page nahunigi na meta ga ararigi na bagatauhata, ma na enoni koro ka page nahunigi na meta renigi na tauhata koro.

¹⁵Na enoni bekabekaga ki tongesurigi na ani mavê na marâ ma na enoni ni takoha ki hagakitagi hagenago.

¹⁶Na enoni ni takoha ki mamakuku tenigi na eraha ma na ani ga bekabekaga ka pe hagakitagi hagenago ma ka tatahigi hete na marâ.

¹⁷Na enoni ga bagamangamangariaga ngaira ka katogi na tarani ga bekabekaga, ma na anoni ni takoha ka gâga haritagi ma.

¹⁸Na enoni ga pe nahuni takoha ka nahunigi na meni ararigi na bekabekaniha iata, ma na ani ga nahuni takoha ka page nahunigi na giraraha.

¹⁹Na enoni era ka page tubêso tangara na enoni koro ma ka page avarasira.

²⁰Na enoni ka ruhia na enoni matareha henaka vi ngaira nikâ ka na tamana. Ma na enoni ruruguha na enoni rako ka girara.

²¹Manga go obania vigo obakoro, hoi, go korokoro tangara na enoni matareha. Manga go ruhia ta na enoni, igo ko tasi.

²²Manga go uhungia vigo katogi na tarani ga oto na enoni ka hagahigasigo ma ka hagêguritogo renigo. Ma ki manga go gâga sutaga, igo ko aharê.

²³Gu tagara, hanana go nahunigi na marâ go mauri re. Manga go oga ma ko tamasi igo ko page matareha.

²⁴Na aitangisiha raha ki na tarepuri tangara na enoni ni takoha mataha, ma na enoni ga pe nahuni takoha ka hagabângenia na bekabekaniha iata.

²⁵Na enoni i tamasi igê na monariha igê na kotiha ngaia ki hagatahia na mêrihana na enoni getea, ma na ani i hagaparu, ki hagarateta na ani getera.

²⁶Na hagahigasiana na Araha ki manga na ve banga ni mêriha ma ki katoa na ruma iana ki gâga purupurunguniaga.

²⁷Na hagahigasiana na Araha ki manga na ve banga ni mêriha ma ki hagatahigo tenia na basu ni mera.

²⁸Na raramohana na maneraha ki raharaha manga na enoni i marungira ka rakorako ngavê. Manga i mareha, ngaia ki hatohato.

²⁹Manga go haritagi, igo ko hagabângenia vi igo ko nahuni takoha mataha. Ma ki manga go bagamangamangariaga igo ko hagabângenia, vi igo ko bekabekaga.

³⁰I togotogo na obamu, igo ko apekoro. Ma na hengariha ki manga na maeha raha i apemu.

³¹Manga go hagamamasiagara na enoni matareha, igo ko pe hagahigasia God i hagavorara. Manga go korokoro tangara, igo ko hagahigasia God.

³²Na enoni era ka hagaerasira mareta renigi na bagatauhata. Na enoni koro ka tahi renigi na parongata koro, naka ma i arâ me na mera.

³³Na takoha mataha ka oga igê na aitangihana na enoni ni takoha ma ki mareha igê na aitangihana na enoni i bekabekaga.

³⁴Na otoha ki kasia akê na haku na enoni ma na tasi ki hagamakia.

³⁵Na maneraha ki vagevagesira na gavumane iana, manga ga giraragi maninga na tagaraha iata. Ma ngaia ki hagaitangira na ani ga hagêrahu.