Read Kahua NA MARAMARÊRAVA 15 Bible Online

NA MARAMARÊRAVA 15 - Kahua bible

NA MARAMARÊRAVA 15

¹Na haritagiana na aramiha ki bana na mangariaganiha ma na tamasinga ramo ki surea akê.

²Na tamasinga iana na enoni ni takoha mataha ka hagabângenia na aitangisiha. Ma na enoni bekabekaga ka pusurenigi ma na bekabekaniha.

³Na Araha ki bâsigi na ara ni marâ hato, henaka vi i he. Ngaia ki hahutugira na enoni, na ani koro ma na ani era.

⁴Na tamasinga haritagi ka manga na apinige ni mêriha ma na tamasinga i mamasiaga ki katogo ko rumakaka ngavê.

⁵Manga go usitenigi na hagaotonga iana o vaemamu tangago, igo ko beka. Ma ki manga go aganaria, igo ko nahuni takoha.

⁶Na ruruguha ka aharêsia tare na ruma iana na enoni koro ma na enoni era ka anumanuma renigi ma ka tê tara renigi.

⁷Na enoni ni takoha ka tokorenia na aitangisiha ma na enoni bekabekaga ka mareha.

⁸Na Araha ki vagevagesigi na nunginungiha iata na enoni koro, ma ki kitenigi na vogasiha iata na enoni era.

⁹Na Araha ki kitenigi na bagatauhata na enoni era ma ki takuira hete na enoni ga paronga oto.

¹⁰Manga go bagatauhamu, na hagaitangiha raha ki page tarahugo. Manga go kikitenigi na hagaotonga tangago, igo ko page meme.

¹¹Na Araha ki aitangisigi na ara ni marâ hato igê na agua iata na enoni ga bani me. Ma ki manga i he na enoni ki girara i pinihigi na takoha iana tenia God?

¹²Na enoni i kasia akê marena ngaia ki usisitenigi na hagaotonga tanga. Ngaia ki asa vige garigari giraraha tenira na ani ga tako mataha.

¹³Manga go obakoro, igo ko mamanamui. Ma ki manga i rugurugu na obamu, igo ki arikuku na maamu.

¹⁴Na enoni ni takoha ki garigari na aitangisiha. Ma na enoni i bekabekaga ki togotogo na aitangihana renia na hiteniha iana.

¹⁵Tanga na enoni i matareha na ara ni tangiani ka na tangiani ni mamasiaganiha. Ma na enoni ga obakoro ka vagevagesigi na ara ni tangiani igê na ogaha iata.

¹⁶Manga go matareha ma ko hagahigasia na Araha, igo ko teharia na enoni i ruruguha ma ki anumanuma.

¹⁷Na apira ni ruve henia na hetakuiha ki teharia na puruka binibinikaga henia na kiteniha.

¹⁸Na bagamangamangariaganiha ki hagavoregi na hetuguriha ma na haritagiana ki hagavorea na marapeha.

¹⁹Na tara iana na enoni i babaga ki tonetonega ma na tara iana na enoni koro ki mave matarotaro.

²⁰Na kare i takotako ki hagakoro obaterua na enana ma na ani i bekabekaga ki ruhirerua.

²¹Na bekabekaniha ki hagamura na enoni ga bekabekaga ma na enoni ni takoha ka barigigi na tarani ga oto.

²²Manga go garigari giraraha bâraha na katoha iamu ka page tavoraha bâkoro. Manga i mareha, igo ki asa vigu akê me.

²³Manga go nahunia na aramiha igê na matena i arari tangago, igo ko vagevage. Na tarana ngekana ki hagakoro obamu ngavê.

²⁴Na enoni ni takoha mataha ki arâ suria na tara ni mêriha i akê, mareha vi na tara i vatovato tanga na agua iata na enoni ga bani me.

²⁵Na Araha ki ruhuruhugi na ruma iata na enoni ga paroparo ma ki anumasigi na pereperegani na mako iata na gete na nâ.

²⁶Na Araha ki kitenigi na harikatoha iata na enoni era ma ki obakoro renigi na tamasinga ni hetakuiha.

²⁷Na enoni i ravarava haga ngaia ki hagaratena na ruma iana marena. Siana ko aganarigi na vatevate, i era ma ko me bumu.

²⁸Na enoni koro ka arami takotako ma na enoni era ka arami purupuru ma vikana ka akê me na tarani ga pe koro.

²⁹Na Araha ki aganarigi na nunginungiha iata na enoni koro ma ki pe karingara rârâ na enoni era.

³⁰Na mamanamuiha ki hagakoro obamu ma na taroha koro ki hagagatagatanigo.

³¹Na enoni i aganarigi na hagaotonga tanga ngaia ki nahuni takoha mataha.

³²Manga i usi vige karingagi ngaia ki hagaratena marena. Ma ki manga i aganarigi na aitangisiha iana ki akê me bâkoro.

³³Na hagahigasiana na Araha ki bêngenigo tanga na aitangisiha, manga igo ma ko kasigo so maremu.