Read Kahua NA MARAMARÊRAVA 16 Bible Online

NA MARAMARÊRAVA 16 - Kahua bible

NA MARAMARÊRAVA 16

¹Igia na enoni ka nahunigi rako na hagatenga ma God ki nahunigi na aramiha tange.

²Igo ko takusia vari vi na parongamu ki oto ma na Araha ki hagakitakita hete na aitangihamu.

³Gu hagêguria na Araha renigi na takoha iamu, hanana go tavoraha bâkoro igê.

⁴Ki tuguhira na marâ hato ga oga ga tabegi na marâ na Araha i hagavorara tange. Na marâ na enoni era ga tabea, ngaia ka na hagaitangiha.

⁵Na Araha ki kitenira na enoni ga paroparo. Ngaira ki asa iata vige tahi tenia na hagaitangiha i naka tangara.

⁶Go takuia na Araha ma ko tototo suria ma God ki page bonotenigi na tasi iamu. Go hagahigasia na Araha ma ko tahitahi tenia na eraha.

⁷Manga go hagakoro obana na Araha, ngaia ki katora na merongamu ka takuigo nikâ.

⁸Manga go matareha ma ki ototo na parongamu, igo ko teharia na ani i ruruguha ma ki erataga.

⁹Igo ko garigari tara ma God hete kani bêngenigo.

¹⁰Na maneraha ki tamasi urusia God. Na suriha iana ka ototo tare.

¹¹Na Araha ki obanigi na morani na hagarariani na higata ni hagavuringa ma ni vuriha. Siana ko hagahagaparu.

¹²Na maneraha ka kitenigi na tarani i pe oto, suria na otoha ki hagagatagatania na arahanga iata.

¹³Na maneraha ki obanigi na monariha ma ki korokoro tangara na ani ga tamasigi.

¹⁴Manga na maneraha ma ki mangariaga, vari ngaia ki hagamesia na ani i hagamangaria. Tahema na enoni i nahuni takoha ki uhungia vi hagarigu parongana na maneraha.

¹⁵Na maneraha i mamanamui ngaia ki manga na rangi ni hagahisi i hagavorea na mêriha.

¹⁶Na takoha mataha ma na aitangisiha karu teharigi ngavê na golo ma na siliva.

¹⁷Na enoni koro ka pe râ suria na tara i râ tanga na eraha. Hoi, go bâbâ taramu, i era ma ko me.

¹⁸Na paroparoha ki hagavoregi na bagabevoani ma na heruruhiana ki hagavotarigo.

¹⁹Manga go matareha henira na ani ga mamasiaga, igo ko teharira na ani ga ruruguha ma ka hagamamasiagara na enoni ga matareha.

²⁰Manga go agaranigi na hagesuringa tangago, igo ko page akê me bâkoro. Go hagêguritogo renia na Araha ma ko page obakoro.

²¹Go kasia akê na enoni i tako mataha renia na aitangisiha iana. Na tamasinga ga arâ haritagi ka katora na enoni ka aganarigi.

²²Na aitangisiha ki manga na ve banga ni mêriha tanga na enoni ni takoha mataha. Na enoni i bekabekaga ki hagaratena marena renia na bekabekaniha iana.

²³Tenia na aitangihana na enoni i tako mataha ka huhura me igê na tamasinga ga katora na enoni ka aganarigi.

²⁴Na tamasinga ga arâ haritagi ka manga na pirui i mamaki i haramu ma ka koro tanga na apekoroha iamu.

²⁵Na tara go takusia vi i koro, vari ngaia ki bêngenigo tanga na mera.

²⁶Na magêha ki katoa na enoni ki tagara ramo, suria i obania vi uhuhu na magêha iana.

²⁷Na eragani nuni ki gâga sutaga. Na tamasinga iana ka manga na gi i ngaugo.

²⁸Na enoni era ka bagatabotabohara, suria ngaira ka hagatoraira na ani ga hemanatange ka kahu hemeronge.

²⁹Na eragani nuni ki hagabekasia na ani i manatangenia ma ki bêngenia tanga na tarani ga era.

³⁰Na ani ga rengasima ma ka ususu hara, ki kakaga na aitangihana ma ki bagatauhana.

³¹Na mena na ogaha koro ki na mêriha arihu. Na gohogohoraga ki na tarepuri bâkoro.

³²Manga igo ka na enoni haritagi igo ko koro teharia na mane ni me ramo. Manga go ototo surigo maremu, igo ko teharia na ani i marungigi na hinua rako.

³³Na enoni ka ngarangaranigi na hê ma na Araha ma kani girara na aramiha.